Kaso sa Pilipinas lapas na og 100 mil

CEBU, Philippines — Ang Department of Health nakatala og bag-ong “record-high” nga pagsaka sa gidaghanon sa mga bag-ong natakboyan sud lang sa usa ka adlaw human nga dunay nadugang nga 5, 032 ka mga bag-ong kaso sa novel coronavirus disease sa nasud nga karon miabot na og 103,185.

Namatikdan nga sud na sa upat ka adlaw nga nagsige og saka ang gidaghanon sa mga natakboyan sa maong sakit dinhi sa nasud.

Karong semanaha, upat ka adlaw nga sagunson ang pagsaka sa mga kaso, niadtong Huwebes miabot kini og 3,954,  dayon 4,063 pagka-adlaw nga Biyernes  ug 4,963 niadtong Sabado. Kagahapong adlawa, Domingo natala ang dugang 5,032.

Ang maong talaan gikan kini sa nagkadaiyang rehiyon sa nasud lakip na ang Metro Manila nga sukad pa adtong bulan sa Hunyo gipaubos nalang sa general community quarantine aron makabangon ang ekonomiya.

Apan giklaro hinuon sa DOH nga kining pagsaka, epekto kini sa nagkadako sab nga kapasidad sa gobiyerno nga makahimo og test sa mga tawo. Kagahapong adlawa nakatala og dugang 301 nga nangaayo ug 20 nga nangamatay ang DOH.

Sa kinatibuk-an, miabot na og 65, 557 ang nangaayo ug 2,059 na ang nakalas dinhi sa nasud. Sa pagkakaron, ang nasud aduna pay 35,569 ka aktibong mga kaso.           

Balik ECQ?

Sa miaging semana, opisyal nang nalabwan sa Pilipinas ang gidaghanon sa mga kaso sa China sa dihang mitala kini og 85 mil ka kaso itandi sa ilang 84 mil ka kaso.

Sa report sa Philstar.com, ang mga medical professionals didto sa Metro Manila nanawagan sa gobiyerno nga mopatuman og laing enhanced community quarantine bisan duha ka semana lang aron nga makaginhawa sab silang mga medical frontliners ug mahatagan og panahon ang gobiyerno nga usbon ang pamaagi niini pag-atubang sa pandemiya.

Pipila sa mga medical professionals ang miingon nausik lang ang nakab-ot nga kalamposan sa gipatumang mga ECQ ug MECQ sa Metro Manila tungod sa pagpasagad sa mga opisyales sa gobiyerno ug ang gihulagway nilang sinundalo nga pagpatuman sa quarantine.

Usa sa mga gisagop karong pamaagi sa gobiyerno mao ang paghigpit sa kapolisan kauban ang mga barangay tanod batok sa mga quarantine violators pinaagi sa pagdakop ug pagpasilot kanila aron patagmon.                             

Daghang naayo

Sa Central Visayas, dugang 489 na sab ka pasyente ang nangaayo na gikan sa novel coronavirus dinhi sa Central Visayas maong miabot na og 9,575 ang kinatibuk-ang naka-recover gikan sa maong sakit niadtong Agosto 1 sumala pa sa datus sa Department of Health Central Visayas.

Mas daghan kini kun itandi sa mga nadugang nga bag-ong kaso nga moabot sa 184 gikan sa 2, 142 ka swab results nga nigawas niadtong adlawa.

Sa mga bag-ong kaso, ang  56 niini gikan sa Cebu City, 15 sa Mandaue, 24 sa Lapu-Lapu, 61 sa Cebu Province, 10 ang sa Talisay, 9 sa Minglanilla ug 6 sa Consolacion, duha sa Bohol ug usa sa Siquijor.

Kini usab ang hinungdan nga anaa sa 6,070 ang active cases lukop Central Visayas kon diin 1,796 ang na-admit sa tambalanan ug 4,274 ang naa sa isolation facilities. Sumala sa DOH-7 nga anaa sa 16, 496 ang cumulative total sa kaso sa Covid-19 sa rehiyon 7. Samtang 851 usab ang natala nga namatay.  Philstar.com /IBM