Pantalan buksan, LSIs makauli na

CEBU, Philippines — Buksan na ang mga pantalan sa Dakbayan sa Sugbo aron usab makauli na ang mga locally-stranded individuals (LSIs) gikan sa laing lugar. Kini sumala pa ni Konsehal Joel Garganera, deputy chief implementer sa Inter-Agency Task Force (IATF) Emergency Operations Center (EOC) nunot sa pagpaubos na sa dakbayan sa general community quarantine.

Ang mga residente sa dakbayan, ang gikinahanglan lang mao ang travel authority ug identification card.

Samtang ang taga Probinsiya sa Sugbo, ang LSI kinahanglan mopaubos og rapid test apan kun dili makapresentar og negative COVID-19 test result mahimo ang medical clearance nga pirmado sa municipal o city health officer kun asa kini na-stranded.

Laing gikinahanglan sa probinsiya mao ang letter of confirmation gikan sa local chief executive (LCE) sa modawat nga LGU nga nagtugot sa pagdawat sa LSI.

Gikinahanglan sab ang travel authority gikan sa Joint Task Force Corona Virus Shield.

Matud ni Garganera nga walay pakanaugon sa barko kung wala pa ang taga LGU nga mokuha ug dad-on sa staging area aron ipaubos sa basic medical protocols.

Ang mga residente sa dakbayan samtang naa sa bus dunay i-fill out nga information sama kung asa sila nga barangay ug contact number aron inig abot sa staging area.

Kadtong kuhaon og pribado nga mga sakyanan, ang buhaton mao ang pagkuha og barangay clearance aron mapahibawo ang barangay nga dunay LSI nga moabot aron ma-monitor.

Ang pagdawat og LSI magsugod ugmang adlawa. /GMR (BANATNEWS)