Pagkaligo sa waterfalls di pa pwede

CEBU, Philippines — Dili una itugot ang pagkaligo sa mga waterfalls sa Probinsiya sa Sugbo bisan pa man ubos na kini sa modified general community quarantine (MGCQ).

Si Gob. Gwendolyn Garcia nagkanayon nga hinoon mamahimong makakaligo sa dagat nga walay limit sa oras apan dili itugot ang picnic.

“Sightseeing ang allowed nato dili allowed nato ang swimming sa waterfalls,” matud ni Garcia.

Si Garcia nagkanayon nga kun itugot ang pagkaligo sa mga waterfalls, dili malikayan nga adunay mag-picnic ug mangaon.

Gawas pa, kinahanglan usab nga magbutang og mga life guards ug uban pa.

Ubos sa MGCQ, gitugot na ang tourism activities apan kinahanglan obserbaran ang istrikto nga health protocols sama sa 50 porsyento nga operational capacity, physical distancing ug uban pa.

Ang Probinsiya sa Sugbo naghinay-hinay na sa proseso pagbalik sa tourism activities diin gikatakda nga moluwat si Garcia og executive order paglatid sa protocols nga sundon.

“I’d really want to be very very careful in proceeding with the opening up (sa turismo),” matud ni Garcia.

Mga tourism players sa Sugbo nihangop sa desisyon sa Kapitolyo aron hinay-hinay na nga mosugod ang industriya sa lalawigan.

Ang presidente sa Cebu Alliance of Tour Operation Specialists (GATOS) ngasi Alice Queblatin nitug-an nga timaan kini alang sa masaaron nga pagbangon sa industriya.

Dugang pa ni Queblatin nga bisan dili pa sila makalihok sa Dakbayan sa Sugbo apan nakita nila ang lakang paingon sa new normal.

Gipangandaman

Gipangandaman na sa Cebu Provincial Police Office (CPPO) ang seguridad nga ipatuman sa pagbukas pagbalik sa mga tourist destinations sa probinsiya.

Matud ni CPPO director, Police Colonel Rhoderick Mariano, nga sa pagkakaron nagpaabot nalang sila sa EO ni Garcia alang sa mga health protocols nga ipatuman sa kapolisan.

Matud ni Mariano nga usa sa nasabotan mao nga kinahanglan nga adunay istrikto nga advance booking sa buot mobista sa mga destinasyon.

“So far the result of the consultative meeting ay ok naman, amenable naman lahat yung ating mga stakeholders to follow the health standards na gagawin nila bago sila mag-open,” matud ni Mariano. Gipasalig hinoon ni Mariano nga ang iyang mga sakop andam na sa pagtabang aron maseguro ang kaluwasan sa mga mobisita sa mga accredited sa Department of Tourism nga resorts sa probinsiya.

Nunot niini giawhag ni Mariano ang publiko nga mosunod sa mga health protocols nga ipatuman. Rowena D. Capistrano ug Sheriza Mae R. Uy/GMR (BANATNEWS)