1 patay, 2 angol sa aksidente sa motor sa Moalboal
CEBU, Philippines — Usa ang patay ug duha ang angol human nakasugat ug disgrasya ang duha ka mga indian national nga nagmaneho sa ilang motor sa Barangay Poblacion West Moalboal Cebu, alas nuybe kwarenta sa gabii adlaw nga sabado.
Ang nakalas mao ang usa ka ginganlan og Lady Baga, ulitawo ug residente sa maong lugar.
Samtang ang naangol mao sila si Ryan Gabales usaka municipal security guard, 27anyos, minyo ug residente sa barangay bugho sa maong lungsod ug si Jackstill Sab-a, hingkod ang pangidaron ug usa gihapon ka gwardya.
Matud pa ni Corporal Ronel Quinain, Desk officer sa moalboal police station, base sa initial nga imbestigasyon nagmaneho sa ilang tagsa-tagsa ka motor sila si Kumar Sanny, 34anyos, minyo, indian national nga taga Casili Consolacion ug Parvinder Singh, hingkod ang pangidaron, indian national ug taga Poblacion Liloan, padulong sila sa cebu city apan pag-abot sa kurbadahon nga dalan nakabantay sila nga adunay padulong nga sakyanan, apan wala nila napugngi ang ilang dagan.
Tungod kay nawad-an ug control ang usa ka indian national nga si Sunny niigo kini ngadto sa barrier samtang ang nagsunod niini nga si Singh didto niigo sa municipal tent. Ang duha ka mga indian national giingon nga gikan sa Badian ug nakainom ug nagsinumpotay sa pagpadagan sa ilang motorsiklo.
Ang mga naangol dali nga gidala sa Badian District Hospital samtang ang duha ka mga indian national gikuhaan usab ug liquor test.
Gipaabot pa sa kapulisan ang pamilya sa nakalas kung mosang-at ba sila ug kaso. /MEL (BANATNEWS)
- Latest
