Mga natanggong sa ECQ diha sa Lapu-Lapu makapauli na

CEBU, Philippines — Gipahibalo ni Mayor Junard Ahong Chan sa Lapu-Lapu City nga gitugot na nga makagawas kadtong mga nangatanggong human naabtan sa enhanced community quarantine.

Matud ni Chan kadtong nagtinguha nga makapauli ngadto sa ilang mga lungsod o siyudad sa lalawigan sa Sugbo paadtoon sa barangay hall diin sila nagpuyo karon aron iproseso ang pagkuha nila og medical certificate gikan sa City Health Office.

Dugang nilang kuhaon mao ang authority to travel gikan sa iyang buhatan ug ingon clearance gikan sa kapolisan.

Mahimong mogamit sila sa ilang kaugalingong sakyanan o mangabang og laing sakyanan apan kinahanglang mopahibalo silang daan sa lokal nga kagamhanan nga ilang pagaadtoan. /IBM (BANATNEWS)