NOAH Complex gilaumang magamit na sa Hunyo

CEBU, Philippines — Nagpadayon ang pagtukod sa P50 million quarantine facility diha sa South Road Properties (SRP) ug gipaabot nga mahuman kini sa mga mosunod nga semana.

Sayo pa, ang mga miyembro sa konseho sa Siyudad sa Sugbo nagkauyon nga motagana og P50 milyones alang sa kaugmaran sa New Normal Oasis for Adaptation and Home (NOAH) Complex diha sa karaang Bigfoot Studio sa SRP.

Subay niini, ang kanhi konsehal sa Dakbayan sa Sugbo Joy Pesquera, center manager sa NOAH Complex nagkanayon nga ang maong pasilidad mo-cater sa covid-19 positive patients category 1, diin pasabot niini mao kadtong mga pasyente nga asymptomatic o walay sentomas sa virus. Matud ni Pisquera nga ang NOAH Complex usa ka mas dako nga version sa Barangay Isolation Center (BIC).

Ang NOAH Complex adunay upat ka sound stages diin ang average sound stage naa sa 80 ug moabot sa 320 ang capacity niini.

Ang construction cost sa cubicles naa sa P3.4 milyones base sa estimate nga gihimo sa City Engineering Office.

Si Pesquera nagpasalamat  sa private sectors tungod kay sila ang nigasto ug walay nagasto ang siyudad sa maong proyekto.

Karong Hunyo 8, 2020 ang target nga magamit ang facility tungod kay kinahanglan pa nga mokuha og accreditation gikan sa Department of Health (DOH) ug kinahanglan pa usab nga mo-apply og accreditation gikan sa PhilHealth.

Nasayran nga paspas ang pagtrabaho sa siyudad sa maong complex kini pinagi usab sa abag sa 53rd Engineering Brigade sa Philippine Army.

Matud ni Sergeant Delfred Galamiton, foreman sa 53rd Engineering Brigade nga ang ilang team gilangkuban og 55 ka tawo ug duna usab silay female vertical construction team.

Nagsugod sila sa ilang trabaho niadtong Mayo 19, 2020 ug padong na mahuman ang ilang trabaho sa ikatulong quadrant. /BDB (BANATNEWS)