Nabalaka kun magbukas ang klase

CEBU, Philippines — Pipila ka mga ginikanan dinhi sa Siyudad sa Sugbo ang dili pabor nga pasudlon sa klase ilang mga tinun-an karong Agosto 24 tungod sa kabalaka sa kaluwasan sa ilang mga anak ilabi na nga wala pay bakuna batok sa coronavirus disease (COVID)-2019.

Si Pres. Rodrigo Duterte namahayag niadtong Lunes sa gabii nga dili niya isugal ang panglawas sa kabataan pagtungha balik sa eskuylahan hangtud nga walay bakuna batok sa maong sakit.

"I will not allow the opening of classes na mag dikit-dikit ang mga bata. Bahala na hindi makatapos, for this generation wala ng matapos na doctor of engineer. Wala nang aral, laro nalang. Unless I am sure that they are really safe,"matud ni Duterte atol sa televised meeting uban sa Inter-Agency Task Force on Emerging Infectious Diseases.

Wala sab siya mokomento kun ang iyang makaapektar ba unya sa mamumuo ug sa mga tunghaan. Hinuon, wala pa gyud maklaro kun ang gusto sa pangulo mao ba gyuy masunod isip polisiya sa estado.

Sugod Agusto 24

Sa sayo pa si Education Secretary Leonor Briones mipahibalo nga ang school year 2020-2021 pormal nga mobalik sugod Agusto 24, pinaagi sa physical o virtual classes kay matud sa kalihim kinahanglang magpadayon ang edukasyon samtang gisunod ang kaluwasan sa mga tinun-an ug mga magtutudlo.

Apan usa ka amahan, nga si David Duat, 43, taga Barangay Pardo sa Cebu City miingon nga sunod tuig na niya pa-eskwelahon iyang mga anak tungod kay nabalaka siya sa COVID-19.

Nabalaka siyang mahitabo dinhi sa Cebu City ang nahitabo sa ubang nasud nga mibalik na ang klase apan misulbong og balik ang kaso sa virus.

Dili sab siya pabor sa online classes kay alang niya mas nindot matod pa nga aktuwal nga madungog gyud sa mga tinun-an ang leksiyon.

Samtang si Erlinda Wamilda sab sa iyang bahin dili pa siya sigurado nga paeskwelahon iyang anak tungod gihapon sa samang rason.

Si Atty. Rey Gealon, ang tigpamaba ni Cebu City Mayor Edgardo Labella miingon ang mayor mosunod kun mao kini ang palisiya sa nasudnong kagamhanan.

“This is balancing of interest. Tan-awon diha ang development sa bata unya sa laing bahin tan-awon sab ang panglawas sa mga bata kung dili mahimo ang distancing…. Mosuporta ang Mayor niana (baruganan ni Duterte) kay wala’y mas laing importante alang sa Mayor kundi ang kinabuhi sa mga bata nga maoy paglaom sa atong nasud,” asoy ni Gealon.  Rowena Capistrano/IBM (BANATNEWS)