400 ka vendors ni-apply sa Pangkabuhayan Program sa DOLE
CEBU, Philippines — Niabot ngadto sa 400 ka vendors sa Siyudad sa Sugbo kinsa ni-apply sa Pangkabuyan Program sa Department of Labor and Employment(DOLE) ang makadawat karong adlawa og mga grocery item nga mahimo nilang inegosyo.
Matud sa pangulo sa Prevention Restoration Order Beautification Enhancement (PROBE) Raquel Arce karong adlawa 100 ka vendors una ang mahatagan sa mga grocery items sama sa itlog, bihon, canton, canned goods, detergent bar, bath soap ug tag-usa ka sakong bugas.
Giklaro ni Arce nga ang mga vendor nga mahatagan niini mao kadtong mga manindahay nga naapektohan sa gihimong clearing operation sa siyudad human gipatuman ang Memorandum Circular 121 sa Department of Interior and Local Government (DILG).
Ang siyudad sa Sugbo adunay 600 ngadto sa 700 ka vendors diin giawhag sila nga mo-apply sa maong programa.
Adunay upat ka adlaw nga seminar nga gihimo aron paghatag og ideya unsaon pagpalambo sa mga manindahay sa ilang negosyo.
Gibutyag ni Arce nga ang DOLE nihatag og P20,000 nga kantidad sa grocery items alang sa mga manindahay aron makasugod sa ilang pangibuahian.
Giklaro ni Arce nga wala kini nagpasabot nga ang mga vendor nga naapil sa programa sa DOLE dili na sila makabalik og paninda sa sidewalk ug wala usab nagpasabot nga ang wala modawat makabalik usab.
Karon lang nahatag ang maong hinabang tungod kay gipaagi pa kini og bidding ug ang kwarta gi-download niadtong buwan sa Marso ug tungod kay dili mohaom sa emergency purchase hinungdang gisunod ang proseso nga ipaubos og bidding. /BDB (BANATNEWS)
- Latest
