Bag-ong laya gipatay

CEBU, Philippines — Gisaka ug gipatay sa ilang panimaye ang usa ka lalaki nga bag-ong laya gikan sa prisohan sa Purok Lomboy, Sitio Napo, Barangay Guindaruhan, Lungsod sa Ming-lanilla kagahapon sa kaadlawon.

Ang biktima mao si Philip Warren Abatayo, 31-anyos nga nagpuyo sa maong dapit.

Sa inisyal nga imbestigasyon sa kapolisan nasuta nga natulog ang biktima uban sa iyang mga pag-umangkon.

Kalit nga nisulod sa ilang pinuy-anan ang tulo ka lalaking nagsul-ob og bonnet.

Gibunlot ang biktima sa iyang gikatulgan hangtud nga naabot sa gawas sa ilang panimaye.

Wala magdugay, usa sa mga lalaki nga nag-bonnet nibunot sa armas dayon pusil makausa ka higayon sa ulo sa biktima.

Gidala sa tambalanan ang biktima apan gideklarar kini nga dead on arrival.

Nahibaw-an nga ang biktima nadakpan niadtong Septiyembre 30, 2018 gumikan sa kaso sa ilegal nga drugas.

Apan nakapiyansa kini niadtong Marso 5 human nipahimulos sa plea bargaining.

Nagtuo ang kapolisan nga may labot sa ilegal nga drugas ang motibo sa pagpatay sa biktima. /GMR (BANATNEWS)