Most wanted nga magsuon sikop

CEBU, Philippines — Nasikop sa Regional Intelligence Unit 7 ang duha ka top most wanted sa Cebu Provincial Police Office (CPPO) ug Lapu-Lapu City Police Office (LLCPO) sa gipahigayon nga manhunt operation sa Purok 8 , Barangay Masaba, Dakbayan sa Danao.

Pinaagi sa joint operation nga gibuhat sa RIU-7, LLCPO City Intelligence Branch ug Danao City Police Station nadakpan sila si Jaime Velino (top 1 most wanted sa LLCPO) ug Pacondo Velino (top 5 most wanted sa CPPO) nga pulos adunay kasong murder.

Matud ni Police Captain Charlie Santiago, deputy regional chief sa RIU-7, nga nakadawat sila og impormasyon kalabot sa nasikpatan nga duha ka tawo nga nagtagotago sa Dakbayan sa Danao.

“May source kami na may dalawang tawo na most wanted at warrant of arrest kaya nag-validate kami for one week at nag-positive hinuli na naming,” matud ni Santiago.

Subay niini dali nga nipahigayon og monitoring og case build-up ang RIU-7 uban ang LLCPO ug Danao City Police Station.

Dugang pa ni Santiago nga tuig 2017 nagtagotago ang duha human gitumbok nga nakapatay kang Celso Amodia sa Dakbayan sa Lapu-Lapu.

Gituohan nga mga gun-for-hire ang managsuon apan ila pa kini susihon ang impormasyon lakip na ang kalambigitan sa dakung grupo.

Gidakop ang duha pinasikad sa warrant of arrest nga giluwatan ni Judge Ruelo Salabaga sa Reginal Trial Court 7 Branch 54 sa Dakbayan sa Lapu-Lapu.

Wala’y piyansa nga girekomendar ang korte alang sa mga dinakpan.

Ang mga dinakpan anaa na karon sa Danao City Police Station alang sa tukma nga documentation ug uban pa ug ipresentar usab ngadto sa korte. Rowena D. Capistrano/GMR (BANATNEWS)