Mga polis positibo sa COVID-19
CEBU, Philippines — Nagpositibo sa novel coronavirus disease (COVID-19) ang 16 ka polis, duha ka non-uniformed personnel ug duha ka helpers sa San Nicolas Police Station (Station 6) sa Cebu City Police Office human nigawas ang resulta sa gikuhang swab samples gikan sa 56 ka personnel sa maong buhatan.
Matud ni PRO7 Regional Director Police Brigadier General Albert Ferro nga nadawat na nila ang resulta sa COVID Testing niadtong Lunes sa gabii ug gikumpirmar niyang 21 ka mga personnel sa maong police station ang positibo.
Ang maong police station, daan nang nipatuman og self-isolation pinaagi sa pag-cordon sa ilang buhatan pipila ka adlaw na ang nakalabay human nga dunay duha nila ka dinakpan ang nagpositibo sa maong virus sa miaging semana.
Ang 21 gidala na dayon sa isolation facility aron sila maatiman. Tungod sa nahitabo, ang mga sakop sa Crisis Responses Battalion-7 maoy kasamtangang motubag sa mga alarma ubos sa hurisdiksyon sa PS6.
Samtang ang nahibiling 33 ka personnel nga nag negatibo sab sa virus magpadayon gihapon sa ilang isolation diha sa maong buhatan.
“I talked to them and assured them that we will provide them the needed support. They remain in high spirits and most of them are asymptomatic,” matud pa ni Ferro.
Samtang ipaubos sab og swab testing ang tanang sakop sa Carbon Police Station human sab nga nagpositibo sa COVID-19 ang duha nila ka dinakpan sa ilegal nga drugas nga kasamtangan na karong gi-isolate sa Cebu City Jail.
Matud ni Cebu City Police Office (CCPO) Director Police Colonel Josefino Ligan ipaubos sa swab testing ang tanang mga polis sa Carbon aron sa masiguro ang ilang panglawas. Mopahigayon sab og contact tracing ang kapolisan ngadto sa mga suod nga pamilyang nakauban sa mga nagpositibo. Rowena Capistrano/IBM (BANATNEWS)
- Latest
