Cebu City andam na sa pagbukas sa klase?

CEBU, Philippines — Mipadayag og kabalaka ug pagduha-duha ang pangulo sa Cebu City Public School Teachers Association (CCPSTA) sa pagpangandam nga gihimo sa  Department of Education(DepEd) alang sa umaabot nga subling pag-abli sa klase alang ning tuiga.

Ang pangulo sa CCPSTA nga si Remus Marinas nabalaka nga basin ang preparasyong gihimo sa DepEd nga gihulagway niyang ‘structured’ masusama sa pamaagi sa gibuhat nila sa COVID-19.

“Ang guidelines, structured. Lisod siya i-adopt sa mga kada eskwelahan, dili siya ing-ana ka sayon. Mao unya na among e raise na among meeting unya,” matud ni Marinas nga maoy representante sa mga kaubang public school teachers. Gipaabot nga dunay mahitabong panagtigum atol sa unang adlaw sa online enrollment karong Hunyo 1, pinaagi sab sa enrollment ayha pa nila mahibaw-an kun pila ka mga estudyante ang mobalik sa pagtungha human niining COVID-19 pandemic.

“Ang amo untang gusto unta nga sa implementing guidelines sa DepEd, dili gyud siya nga mao gyud siyay sundon nga protocol, kay kung mao nag sige’g sundon na protocol, mayabo tanan ana kay walay maestra andam motudlo ani,” dugang pagpasabot ni Marinas.

Sumala pa nga kun magklase man gani pinaagi sa online, alternatibo o pisikal nga pagtambong sa mga bata sa klase, magagad unta sa sitwasyon sa lugar diin nahimutang ang mga estudyante.

Gihimong sanglitanan ni Marinas  ang nahitabo sa Sitio Zapatera sa Barangay Luz sa dihang gituman sa siyudad ang protocol. Matud niya nga naghuot ang mga molupyo sa maong dapit mao nga ang resulta nidaghan hinuon ang mga kaso.

Mao sab kini ang sitwasyon sa Mambaling nga wala makapangandam sa kalit nga pagsaka sa gidaghanon sa mga natakboyan.

“Sa Cebu City, structured ra kaayo sila, ang gihatag nga guidelines, ila ra gyung gisunod, na kung asymptomatic balay ra gyud ka. Unya wa nagtan-aw nga ang balay, sikit-sikit. I hope di maparehas ang sa pagsugod na klase unya,” sumala pang Marinas. Laing gikabalak-an mao ang kaluwasan sa mga magtutudlo kun maghimo og home visitation sa distance o alternative learning. Kinahanglang siguradong luwas adtuon ang lugar.

“Katong dili pwde mag online, unsay remedyo? Pwede siya’g kaning gitawag na alternative classroom. But, kanang area like sitio zapatera, pila ka estudyante diha? I identify na sila, moanha ang maestra diha, unya, kinsay moanha nga maestra diha sa lugar na gi-declare nga infected? Mao nay mga problema ba,” dugang pang Marinas. Gawas pa niana, dili sab praktikal nga kada magklase magsuot og PPE  ang maestro kun adto magklase sa balay sa estudyante tungod kay hasol kini. Kinahanglan sab ang hazard pay ug kasigurohan ang mga magtutudlo.

“Assessment lang gyud dapat sa kada lugar.Mao nay among hangyo ba, nga dapat i customized siya. Dili siya standard gyud, nga structured. Ang atong sistema sa education ron, standard man, kung unsay didto, mao gyud na siyay pattern.Dapat customized gyud siya, kay diri sa Cebu City, di na siya pwede sa amoa,” panapos ni Marinas. /IBM (BANATNEWS)