P70 milyones kinatibuk-ang balor sa shabu nga nasakmit
CEBU, Philippines — Nikabat ngadto sa P70 milyones ang balor sa shabu nga nasakmit sa Cebu Provincial Police Office (CPPO) sulod sa usa ka buwan nga pagpatuman sa enhanced community quarantine (ECQ) sa Probinsiya sa Sugbo.
Kini maoy gibutyag ni Police Colonel Rhoderick Mariano, direktor sa CPPO diin nikabat sa 176 ka drug pusher ug 57 ka user ang ilang nadakpan.
Giingong nikabat sa 236 ka kilong marijuana ug unom ka kilong shabu ang nasakmit sa CPPO diha sa Dakbayan sa Carcar.
Gawas sa drugas, niabot sa 300 ka tawo ang nadakpan tungod sa ilegal nga sugal. Ang CPPO nagplanong morekomendar sa kagamhanan sa probinsiya nga dili hatagan og hinabang ang mga nadakpan tungod sa sugal.
Nikabat usab sa P24,000 nga pusta ang nasakmit sa kapolisan gikan sa 88 nga nadakpan tibuok probinsiya.
Si Mariano nimando ngadto sa tanang hepe sa probinsiya pagsumitir sa ngalan sa mga nadakpan sa ilegal nga sugal aron ihatag kini ngadto sa Department of Social Welfare and Development (DSWD) ug sa provincial government. /BDB (BANATNEWS)
- Latest
