15 market vendors sa nagpaburot sa presyo
CEBU, Philippines — Giimbestigahan karon ang 15 ka mga manindahay sa mga pangpublikong merkado sa Dakbayan sa Sugbo tungod sa pagpaburot nila sa presyo sa ilang mga baligya tungatunga niining krisis sa coronavirus (COVID-19).
Ang maong mga market vendors gimandoan sa pag-esplikar nganong dili sila mahimong pahamtangan og silot administratiba sama sa pagsira sa tindahan o pag-terminate sa ilang market space lease contract tungod sa sobrang pagpa ginansya.
Ang City Legal Office nakadawat og endorsement gikan sa Market Administrator Jonil Matuguina nga nagbutyag sa mga pangalan sa manindahay lakip ang gipaburot nilang presyo sa ilang mga baligya.
Matud pa ni Atty. Rey Gealon ang endorsement nga giduso sa ilang buhatan naglangkob sa Citation Tickets nga giisyu sa upat ka mga public markets nga naglangkob sa Capitol, Talamban, Pardo ug Quiot.
Dugang pa ni Gealon, ang Market Operations Division Enforcers nagtuyok sa mga pampublikong merkado sa nakalabay nga semana ug nasuta nga dunay mga vendors nga nipasaka sa mga presyo sa itlog, prutas, utanon ug uban pa base nga lapas sa gimando sa Department of Trade and Industry.
"City Ordinance No. 2486, otherwise known as the 'Cebu City Market Code of 2007' considers this unreasonable and unconscionable price increases as prohibited acts which likewise carries with it an administrative penalty," pagkutlo pang Gealon.
Sumala pa ni Gealon, gimandu ni Mayor Edgardo Labella sa pagpahigayon sa inspeksyon ug monitoron kanunay ang tanang merkado publiko sa dakbayan ug ipatuman gyud ang price freeze o ang pagdili sa mga vendors sa pagpaburot sa ilang presyo.
Nasayran nga dunay mga mamalitay ang nagbagulbol gumikan sa pagsaka sa presyo ilabi na sa mga utanon ug prutas nga triple gikan sa kasagarang presyo. /IBM (BANATNEWS)
- Latest
