Seguridad sa Cebu City Jail gihugtan

CEBU, Philippines — Karon nga midaghan ang kaso sa coronavirus (COVID-19) sa sud sa Cebu City Jail, ang dakbayan, kapolisan ug simbahan naghimo og mga lakang aron matabangan ang mga inmates sa ilang kahimtang.

Kagahapon sa buntag gihatud ni Konsehal Dave Tumulak ang pasiunang tabang gikan sa siyudad ngadto sa Cebu City Jail Male ug Female Dormitories sama sa  1,500 facemasks ug 200 ka mga face shields alang sa mga priso ug mga sakop sa Bureau of Jail Management and Penology (BJMP) sa maong pasilidad nga ilahang dugangan sa mosunod nga mga adlaw.

Giklaro sab ni Tumulak maong nag noise barrage ang mga priso sa miaging adlaw  gumikan kay nakalitan sila sa pagabot sa daghang mga polis.

Ang maong mga polis gipadala sa dapit alang sa seguridad sa tanan apil na sa mga priso. Gawas pa niana, giingong nagsaba-saba ang mga priso tungod kay dunay nikatap nga estoryang ipahunong ang dunol nga walay kamatuoran.

Si Cebu City Jail Warden, Colonel Julius Arro, niklaro nga walay kagubot nga nahitabo didto kay matud niya nahilot dayon kadto human napasabot ang mga inmates sa sitwasyon.

Matud ni Arro nagkinahanglan sila og immune booster sama sa Vitamins C, facemask ug mga disinfectants. Ang CCJ aduna nay 129 nga kompirmadong COVID-19 positive human nadugangan kagahapon og duha.

Nag-cell quarantine

Gibutyag sab ni Tumulak nga mismo ang mga mayor sa mga selda nipatuman og self-quarantine sa tanang sakop niini. Di sila tugotan paadtuon sa ubang selda aron paglikay nga matakdan sa virus.

Ang maong prisohan gilibotan na karon og usa ka gatos ka polis gikan sa Cebu City Police Office nga giabagan sab og mga sundalo gikan sa Central Command ug aduna pay standby nga crisis response battalion aron pagtubag kun gikinahanglan.

Sa pikas bahin, ang pangulo sa Commission on the Laity sa Archdiocese of Cebu Fe Mantuhac-Barino nanawagan sa publiko nga modonar para sa mga inmates sa CCJ.

Matud pa ni Barino, atol sa pakighinabi kaniya sa Banat News nakapadala na sila og 300 ka box nga vitamins para sa lima ka adlaw ngadto sa mga inmates pinaagi sa Archdiocese of Cebu sa Commission on the Laity ug Cebu Caritas Inc.

Nagtinguha silang makahatag og Vitamin C para sa kinse ka adlaw ug 12 mila ka mga washable facemasks. Rowena Capistrano ug Sheriza Mae Uy/IBM (BANATNEWS)