JO sa Cebu City nagdala og drugas; Duha ka babayeng durugista sikop

CEBU, Philippines — Usa ka job order sa Cebu City Hall ang nadakpan sa kapolisan sa Dakbayan sa Talisay human nakuhaan og ilegal nga drugas diha sa Barangay Bulacao, Siyudad sa Talisay kagahapon sa udto.

Si Edgardo Flores Jr., 30-anyos giingong nadestino kini diha sa treasurer’s office sa Cebu City Hall ang nakuhaan og ilegal nga drugas samtang niagi sa checkpoint.

Si Police Major Gerard Ace Pelare, hepe sa Talisay City Police Station nagkanayon nga molabang unta sa boundary si Flores.

Apan dihang gipangayoan kini og dokumento nahagbong ang unom ka putos nga ilegal nga drugas hinungdan nga dali kining gisignit sa kapolisan.

Si Flores natingkagol kini sa detention cell sa Talisay City Police Station ug gikatakda kining pasakaan og tukmang kaso sa nahimo niyang kalapasan.

Subay niini, Ang City Legal Office (CLO) nirekomendar sa pagpalagpot ni Flores sa iyang trabaho isip JO sa Cebu City Hall.

Si Atty. Rey Gealon, pangulo sa CLO nibutyag nga si Flores nadestino kini isip Accelerated Social Amelioration Program Profiler ubos sa city treasurer’s office.

“A case for violation of Section 11 of RA 9165 otherwise known as the "Dangerous Drugs Act" will be filed against him, as confirmed by Talisay City Mayor Samsam Gullas in a phone call I had with him”, matud ni Gealon.

Dugang ni Gealon nga ang administrasyon ni Mayor Edgardo Labella dili motugot sa maong sayop nga binuhatan ilabi na sa pagkalambigit sa ilegal nga drugas.

Sa laing bahin, duha ka babaye nga durugista ang nasikop sa mga sakop sa Provincial Intelligence Branch (PIB) diha sa Sitio Mananga 2, Barangay Tabunok, Dakbayan sa Talisay niadtong Lunes sa      hapon.

Ang subject sa operasyon mao si Carmel Nacario Tulud, 43-anyos, nagpuyo sa nahisgutang lugar ug nasikop usab ang iyang kauban nga si Chloe Gella Cabuenas, 25- anyos.

Ang grupo nila ni Police Lieutenant Colonel Marlu Conag nihimo og transaksiyon tali ni Tulud hinungdan sa pagkasikop sa suspetsado.

Nasakmit sa kapolisan gikan sa mga suspetsado ang 75 gramos nga shabu nga gibana-banang nagkantidad og P510,000.

Ang mga suspetsado natingkagol usab kini diha sa detention cell sa Talisay City Police Station. Rowena D. Capistrano/BDB (BANATNEWS)