Pagsul-ob og mask ug pagdala sa QP higpit gipatuman sa Medellin

CEBU, Philippines — Higpit nga gipatuman sa  kagamhanan sa Lungsod sa Medellin ang pagsul-ob og face mask ug  ang pagdala sa home quarantine pass sa tanan nga mga molupyo  nga nagtinguha sa paggawas alang  sa ilang pagpalit og tambal o pagpamalit og mga gikinahanglan  sa ilang panimalay.

Gipahibalo  sa kagamhanan  sa maong lungsod ang maong advisory sa   ilang official facebook  page uban ang  pagpanghimakak sa mga gihuhungingong  nga ilang gipatuman ang lockdown  sa tibuok dapit sa maong lungsod.

Sa post usab sa facebook page sa lungsod ilang gipasabot ang kabahin sa nagpadayon nga mga pamaagi  aron mapugngan ang pagkuyanap sa covi-19 apan walay  kamandoan  sa lockdown.

Hinuon ilang gipahimangno ngadto  sa mga molupyo ang pagpabilin diha sa sulod  sa ilang panimalay  apan kon kinahanglan nga mogawas kay adunay  paliton nga tambal  sa botika o tindahan dili gyud malimot sa pagsul-ob og face mask.

“Nagmando na ang atong lungsod nga kinahanglan na magsul-ob og mask ang tanang mogawas sa balay ug dili na makapalit o makabuhat ug transaction ang walay home quarantine pass”, tipik sa gipagawas nga advisory sa lungsod.

Giklaro usab diha sa advisory nga ang mga makalapas sa kamandoan ang pahamtangan og silot lakip na niini ang pagbayad og multa.

Ang mga establsamento nga mohatag og pagtugot sa mga tawo nga makasulod bisan  wala makapakita og quarantine pass o wala magsul-ob og face mask ang mahimutang usab  sa risgo ang iyang negosyo tungod kay bakwian kini sa ilang business permit. /BDB (BANATNEWS)