Hinabang sa senior citizens ihatud sa ilang mga balay

CEBU, Philippines — Si Mayor Edgardo Labella sa Dakbayan sa Sugbo nangayo og despensa ug pagsabot sa mga senior citizen tungod sa kalangay sa pagpang-apod-apod sa mga hinabang pinansiyal.

Kini gumikan sa problema kalabutan sa covid-19 nga giatubang karon sa tibuok nasud.

Matud ni Labella nga nagpahigayon sila og tigom uban sa mga opisyal sa lokal nga kagamhanan lakip usab ang Land Bank of the Philippines alang sa tinguha nga ipaagi sa ATM ang pagpanghatag sa financial assistance sa mga senior citizen tungod sa pagsunod sa gipatuman nga social distancing.

Apan tungod kay molanat pa og pipila ka buwan o semana hinungdan nga nadesisyonan sa siyudad nga ipanghatag kini ngadto sa balay-balay uban sa mga kapitan, kapolisan, department head ug military.

Gibutyag ni Labella nga atol sa ilang tigom ilang nadesisyonan nga kong mahuman na tanan nilang mga payroll sa kapin 80 mil ka senior citizens ilaha kining sugdan sa paghatag karong Abril 25, 2020.

Gipasabot ni Labella nga dili mahuman og usa lang ka adlaw ang pag-apod-apod sa mga financial assistance nga P2 mil matag senior citizen tungod sa kalapad sa barangay.

Ang bag-ong pamaagi karon nga pag-apod-apod sa financial assistance sa mga senior citizen usa usab kini ka cleansing process diin makita na ang mga senior citizen kong residente ba kini sa dakbayan o posibleng ang uban nangamatay na apan wala lang mataho.

Ang mga senior citizen nga wala sa ilang mga panimalay atol sa pagpanghatag sa mga ayuda sutaon pa ang mga bug-at nga rason niini ug kinahanglang aduna kanunay ang mga barangay opisyal tungod kay sila man ang nasayod sa ilang mga ginsakopan. Decemay P. Padilla/BDB (BANATNEWS)