COVID update: Kaso sa COVID19 sa Pilipinas lapas na og dos mil
CEBU, Philippines — Gikan sa kapin usa ka gatos nga nakompirmar nga dunay COVID-19 niadtong adlaw nga Lunes, nilayat kagahapong adlawa ngadto sa 538 ka bag-ong kaso ang nadugang sa talaan nga nahimo na karong 2,084 dinhi sa nasud sumala pa sa Department of Health.
Kagahapong adlawa sab gipahibalo sa DOH nga dunay napulo ka mga nadugang nga namatay ug nahimo na kini karong 88 samtang 49 na ang nangaayo.
Sama sa nahaunang pamahayag sa DOH, ang pagsaka sa gidaghanon sa mga nahibaw-ang positibo sa COVID19 resulta kini sa pagabot na sa daghang test kits ug ang pagbukas na sa dugang mga laboratoryo nga makahimo og test sa tibuok nasud.
Ang Food and Drug Administration (FDA) miaprubar na sab niadtong adlaw nga Lunes ang paggamit sa lima ka rapid test kits apan kinahanglang gamitan gihapon og polymerase chain reaction-based test alang sa kompirmasyon.
Dunay 17 PCR-test kits ang giaprubahan nga mahimong mapalit apan giklaro nga kinahanglang propesyonal nga doktor ang mohimo sa test.
Niadtong adlaw nga Lunes, ang Department of Foreign Affairs mipahibalo nga dunay 348 ka mga Pilipino gikan sa 30 ka nasud sa Asia Pacific, Europe, Middle East/Africa ug Americas ang natakboyan sa maong sakit.
Ang 228 niini naa sa tambalanan, 111 na ang nangaayo ug dunay lima Uropa ang namatay. Ang gidaghanon sa natakboyan sa maong sakit sa tibuok kalibotan miabot na og 784 mil ug 37,600 na ang nangamatay. /IBM
Related video:
- Latest