Pangalan ni Mayor Gullas ug Bishop Billones gigamit sa mangingilad
CEBU, Philippines — Usa ka bayot nga suspetsadong mangingilad ang nadakpan sa kapolisan sa Dakbayan sa Talisay human gireklamo nga nangayo og kwarta aron ipamalit og mga kagamitan paglikay sa covid-19.
Nasikop niadtong Huwebes sa gabii si Hector Montemayor alyas “Jun Mark Edoloerio”, alyas “Kenneth Angelo Canapi”, 26-anyos nga taga Barangay Poblacion, Siyudad sa Toledo.
Si Montemayor ang gireklamo ni Analie Badajos Mission, 21-anyos, taga Sitio Tunga, Barangay Tanke, Dakbayan sa Talisay.
Si Police Major Gerard Ace Pelare, hepe sa Talisay City Police Station nagkanayon nga niadtong niaging semana nikatap ang suwat nga nangayo og kwarta gamit ang pirma ni Mayor Gerald Anthony “Samsam” Gullas Jr.
Si Gullas nakadawat og report kabahin sa maong insidente hinungdan nga iyang gimandoan ang kapolisan nga pangitaon ang tawo nga nigamit sa iyang pangalan ug pirma aron mangilkil og kwarta.
Si Pelare nibutyag nga ilang nasuta nga adunay warrant of arrest ang suspetsado sa kasong estafa.
Giawhag ang ubang biktima nga mobisita diha sa buhatan sa kapolisan sa siyudad aron mopasaka usab og kaso batok sa suspetsado.
Katawhan giawhag
Sa laing bahin, si Cebu Auxiliary Bishop Midyphil “Dodong” Billones niawhag sa katawhan nga motaho sa simbahan ug kaniya sa higayon nga adunay mag-solicit kanila diin gigamit ang iyang pangalan.
Kini human adunay sakop sa Brotherhood of Christian Businessmen and Professionals (BCBP) ang nakadawat og text message.
Ang sender sa message nga gamit ang mga numero sa cellphone nga 0922-463-4592 nagpaila nga siya si Billones ug nangayo kini og donation alang kunohay sa usa ka deacon nga giingong gikan sa Dakbayan sa Lapu-Lapu ug ordinahan ngadto sa Quezon City.
Giingong ang maong deacon mao si Reverend Marlou Quirante nga adunay mga numero sa cellphone nga 0997-540-7993 ug dihang gitawagan kini wala motubag.
Giklaro ni Billones nga wala siya makaila sa maong deacon ug labaw na nga wala usab siya mangayo bisan unsa nga donation pinaagi sa text message. Rowena D. Capistrano/BDB (BANATNEWS)
- Latest
