460 konsehal exposed sa COVID?

CEBU, Philippines — Nabutang sa peligro ang 460 ka konsehal sa mga siyudad ug lungsod sa Lalawigan sa Sugbo sa coronavirus disease atol sa ilang pagtambong sa Philippine Councilors League 11th National Congress sa Pasay City niadtong Pebrero 26-28.

Kini human usa sa 17,000 ka nitambong gikan sa Negros Oriental ang anaa karon sa tambalanan kinsa positibo sa COVID-19.

Apan matud sa pangulo sa PCL Cebu Chapter, Francis Salimbangon, nga hangtud kagahapon walay gikataho nga iyang sakop nga dunay sintomas sa sakit.

Ang 65-anyos nga konsehal sa Negros Oriental duna nay sakit daan ug nipuyo pa kini og pipila ka adlaw sa Greenhills, San Juan kuyog sa pamilya human sa kalihukan sa PCL.

Si Dr. Shelbay Blanco, hepe sa Regional Epidemiology and Surveillance Unit 7, nagkanayon nga pipila sa mga konsehal sa Central Visayas ang apil sa persons under monitoring.

Giklaro hinoon ni Department of Health 7 Director, Dr. Jaime Bernadas, nga ang konsehal nga positibo sa COVID-19 wala moagi sa Sugbo sa pag-adto sa Manila. Gisusi na sab karon sa DOH ang mga tawo nga nahimamat sa maong konsehal sa ilang lugar.

Piyesta padayon

Samtang pipila ka piyesta sa kalungsoran ang magpadayon gihapon bisan pa man sa hulga sa COVID-19. Matud ni Maria Lester Ybañez, ang provincial tourism officer, nga wala pa silay nadawat nga taho nga nagkanselar sa mga piyesta gawas sa Sarok Festival sa Consolacion niadtong Pebrero ug plano nga ipadayon karong Abril.

Sa iyang bahin si Talisay City Mayor Gerald Anthony “Samsam” Gullas Jr. nitataw nga walay bisan usa nga Talisaynon ang nagpositibo sa COVID-19 sukwahi sa nikatap sa social media.

Giawhag ni Gullas ang tanan nga dili magpataka og post diha sa social media aron dili makahasol sa uban.

Samtang gipaubos sa thermal scanner ug gipasul-ob og mask ang mga nipaubos sa aftercare program sa Dakbayan sa Talisay. Si Dr. Rey Cesar Bautista, pangulo sa programa, nagkanayon nga istrikto gyud sila sa mga tawo nga ilang kaatubang hinungdan nga ila gyud susihon kung aduna ba kini hilanat o ubo.

Merkado gipalimpyohan

Aron maseguro nga magpabilin nga wala’y kaso sa COVID-19 sa Siyudad sa Sugbo, usa ka dungan nga pagpanglimpyo ang gipahigayon sa tanang merkado publiko sa siyudad. Uban ang mga department heads, si Cebu City Mayor Edgardo Labella nisuroy sa kamerkaduhan ug nipasabot sa tumong sa pagpanglimpyo.

Tinguha gyud sa siyudad nga wala’y local transmission sa COVID-19. Gipatuman sab sa Cebu City Hall ang pagpaubos sa thermal scanner sa mga mobisita.

Gipanagoan susihon

Samtang nibahad ang Police Regional Office 7 nga imbestigaron ang mga negosyante nga giingong nanago sa tinda nga facemask, alcohol ug uban pa nga proteksyon sa COVID-19.

Buot ni PRO-7 Director Albert Ferro nga likayan ang nahitabo sa laing nasud ug sa kauluhan ilabi na nga ilang nabantayan nga nag-panic buying na ang pipila ka tawo ug nagkamahal na sab Ang facemask ug alcohol. 

Makig-alayon ang PRO-7 sa Department of Trade and Industry aron mabadlong ug mapasakaan og kaso kadtong mopahimulos sa higayon. Nanghatag og facemask ug alcohol ang Cebu Provincial Police Office (CPPO) ngadto sa mga personnel niini nga nadestino sa kampo.  Matud ni CPPO Director Rhoderick Mariano nga gipatuman sab ang “no mask, no entry policy” sa mga police stations samtang duna sab silay thermal scanner.

Graduation ceremony

Sa laing bahin ang Department of Education 7 nipahibawo nga karon adlawa ang katapusan nga adlaw sa mga class requirement tungod kay ipahigayon na sunod semana ang final exams.

Matud ni Amaryllis Villarmia, information officer sa DepEd-7, nga subay sa DepEd Order No. 2 series of 2020, ipahigayon ang mga moving up ug commencement exercises human na sa Semana Santa apan kung mograbe pa ang COVID-19 hayan wala nay graduation ceremonies. Le Phyllis F. Antojado, Gabriel C. Bonjoc, Decemay P. Padilla, Sheriza Mae R. Uy ug Rowena D. Capistrano/GMR (BANATNEWS)