15 mil marijuana nalarot sa danao

CEBU, Philippines – Mobalor ngadto sa P8 milyones nga balor sa marijuana ang nalarot sa Regional Mobile Force Battalion, 703rd Maneuver Company diha sa Barangay Togonon sa Dakbayan sa Danao.

Gipangulohan ang maong operasyon ni Police Captain Emmanuel Rabaya human sila nakadawat og reports gikan sa mga residente kalabot sa giingong plantasyon sa marijuana sa maong barangay.

Nalarot sa mga operatiba ang 15 mil nga fully grown marijuana ug singko mil nga marijuana seedlings.

Nikuyog sa maong operasyon ang mga sakop sa Danao City Police Station ug Cebu Provincial Police Office Mobile Force Company ug ingon man sa Philippine Drugs Enforcement Agency (PDEA)7.

Tungod sa gidaghanon ug gilay-on sa plantasyon ug sa labing duol nga karsada nagkuha nalang ang kapolisan og pipila ka punoan aron himuong ebidensya ug ang uban gidauban nalang diha sa lugar.

Wala hinuon ibutyag kun dunay nadakpang nananom sa maong mga marijuana, apan makita nga limpyo ug inatiman ang mga tanom tungod kay hawan ang palibot sa mga punoan sa marijuana.

Sa pikas bahin, nadakpan sa kapolisan  ang top  9  sa regional High Value  Target  sa kapolisan sa Dakbayan sa Lapu-Lapu sa gihimong buybust operation diha sa operation  sa dalan  S.  Osmeña   sa  Barangay  Gun-ob.

Ang City  Intelligence  Branch  (CIB)   sa Lapu-Lapu  City  Police Office (LLCPO) pinangulohan ni Police  Lieutenant  Colonel  Mark  Gifter   Sucalit  nakadakop sa  habal-habal driver nga si Ricky  Ybañez  Ycong,  38. Si Ycong gikatahong namaligya og ilegal nga drugas ug namasahero sab isip habalhabal driver.

Pito  ka medium  size  nga paketeng gidudahang shabu ang nasakmit  gikan sa suspek.

Ang mga dinakpan  nagtingkagol   sa karon prisohan ug pasakaan og kasong paglapas sa Republic   Act  9165  o Comprehensive  Dangerous  Drug  Ac t of 2002. – Sheriza Mae Uy ug Romeo  T.  Limpangog/IBM

PRO-7 naghimo’g pansayan sa Brgy. Tanke

Lain nasab nga hiniusang pagpanglimpyo sa kadagatan sa Barangay Tanke ang gihimo sa kapulisan ug opisyales sa barangay kagahapon sa buntag.

Si Police Brigadier General Albert Ignatius Ferro, direktor sa Police Regional Office (PRO-7) maoy nangulo sa kapulisan kauban si Mayor Gerald Anthony “Samsam” Gullas Jr. Gawas niana, gi turnover sab nila ang pansayan nga ilang gihimo alang sa mga residente aron dili na sila magpataka sa pabuhagay sa ilang hugaw.

Si Police Major Gerard Ace Pelare, pangu sa Talisay City Police nagkanayon nga kabahin kini sa ilang mga programa aron mawagtang na ang ilegal nga drugas sa lugar.

Nagpadayon ang ilang 24 -oras nga checkpoint pinaagi sa mga sakop sa Regional Mobile Force Battalion (RMFB-7).

Gani niabot na sa 222 ka mga tawo nga nalambigit sa ginadiling drugas ang ilang nadakpan sugod sa buwan sa Enero.

Nagtuo si Pelare nga ang dako kini og tabang ang ilang gibuhat tungod kay ang suporta sa katawhan naa naman nila ug wa na ngadto sa mga dautan.

Atol sa pagpanglimpyo sa baybayon kagahapon, dunay mga kabataang nagdala og mga placards nga nagpasalamat sa kapolisan ug sa lokal nga kagamhanan sa pagtukod og pansayan sa ilang lugar.

Ang Brgy. Tanke maoy grabe ang paghitak sa ilegal nga drugas sukad pa kaniadto apan human sa gihingusgang kampanya sa kapolisan ug karon ang pakiglambigit sa mga polis sa mismong mga residente nimenus na ang nangadakpan.

Malaumon ang kapolisan nga pinaagi sa paghatag og ayuda alang sa basic services sa barangay makadani kini sa mga residente sa pagkooperar sa kampanya batok sa ilegal nga drugas. /IBM (BANAT NEWS)