People Power gihandum pinaagi sa rally
CEBU, Philippines — Nagpahigayon og rally ang mga progresibong pundok subay sa ika-34 nga sumad sa EDSA People Power Revolution.
Gatusan ka tawo ang naglakaw gikan sa Fuente Osmeña Rotunda bitbit ang nagkadaiyang placards nga nagpadayag sa ilang kasagmuyo sa administrasyon ni Presidente Rodrigo Duterte.
Nihapit sila sa Police Regional Office 7 diin gipadayag sab nila ang mga isyu batok sa kapolisan nga gawasnon.
Kahinumduman nga sa niaging tuig ang mga nag-rally nisuway og sulod sa PRO-7 nga niresulta sa komosyon ug kadaut sa mga butang gumikan sa ilang kasuko nga gitukaran sila og kusog nga theme song sa Voltes V samtang nagtapok sila gawas sa kampo.
Sa dalan Colon ang ilang programa diin ilang gisinggit ang tanang kasagmuyo sa administrasyon ni Duterte.
Matud ni Jaime Paglinawan sa Bagong Alyansang Makabayan nga panahon na karon nga ang katawhan motingug ilabi na kadtong napiit sa pakyas nga pagpatuman sa mga saad ni Duterte.
Matud ni John Ruiz, Bayan Muna-Central Visayas coordinator, nga ang ilang panawagan mao nga kun dili makaya ni Duterte barugan ang mga saad sa katawhan nga kabag-ohan sama sa pagtapos sa kurapsiyon ug pagsumpo sa problema sa drugas mas maayo nga mokanaug kini sa pwesto.
Gipahigayon sab ang paglabay og lata nga kamatis sa dagway ni Duterte nga gisuwatan og “Traydor”, “Oust Duterte” ug uban pa.
Niuban sab sa rally ang Anakbayan, PISTON-Central Visayas, Kilusang Magbubukid ng Pilipinas (KMP) ug uban pa. Decemay P. Padilla/GMR (BANATNEWS)
- Latest
