Malasakit Center lounge sa LTO paestaran sa mga deboto
CEBU, Philippines — Ang Land Transportation Office (LTO)-7 mopagamit sa Malasakit Center lounge diha sa Natalio Bacalso Avenue atol sa kapistahan ni Senior Santo Niño.
Kini isip halad sa maong ahensiya ngadto kang Santo Niño. Matud ni LTO-7 Regional Director Victor Caindec nga mahimong estaran sa mga deboto ang Malasakit lounge ilabi na niadtong mga deboto nga wala pay kapuy-an o wala pa maka-book og hotel.
Hinuon ang mga senior citizen, mabdos, nagpasuso nga inahan ug Persons with Disability (PWDs) ang hatagan og proyoridad sa LTO.
Nasayran nga ang Malasakit lounge mahimo kining maka-accommodate og 50 ka tawo.
Gawas sa libre nga pag-standby adunay itanyag nga libreng tubig ug kape ang LTO-7 ngadto sa mga deboto.
Ug kon dili kapaigo ang Malasakit lounge nagplano usab si Caindec nga ablihan ug ipagamit sa katawhan ang Duterte People’s Hall nga nahimutang sa ikaduhang andana sa pasilidad. Buksan ang Malasakit lounge karong adlaw nga Lunes hangtud sa Biyernes gikan sa alas 8:00 sa buntag hangtud sa alas 5:00 sa hapon. – Decemay P. Padilla/BDB
Mga deboto padalhon og sudlanan og tubig
Ang katawhan kinsa moapil o motambong sa Sinulog solemn foot procession ug sa grand parade ang giawhag sa pagdala og kaugalingong botilya o tumbler nga sudlan sa ilang mainom kini isip pagpakabana sa kalikupan.
Ang mga deboto mahimong makapahimulos sa libreng bugnaw nga tubig nga mainom.
Atol sa maong kalihukan unom sa siyam ka water stations sa Metropolitan Cebu Water District ang manghatag og bugnaw nga tubig.
Ang Kooler Industries Inc. maoy nihatag og mga water dispenser.
Tumong sa paghatag og tubig aron mokunhod ang paggamit og plastic ug pagmenos sa mga basura.
Ang “Bring Your Own Bottle” o #BYOP nga programa sa MCWD ang nakitang makatabang sa pagpreserba sa kalikupan.
Ang mga water stations gilangkuban diha sa General Maxilom Avenue, Osmeña Boulevard.
Ang ubang water stations alang sa grand procession diha sa dalan Don Pedro Cui, sa karaan nga Sacred Heart School Campus ug atubangan sa MS MotoSuit sa General Maxilom Avenue.
Alang sa solemn procession sa Sabado Enero 18, ang waters stations anha diha sa Osmeña Boulevard ug dapit sa USC South Campus.
Maghatag usab ang MCWD og libreng tubig alang sa mga out-of-towners sa Devotee City nga nahimutang sa bakanteng luna sa South Road Properties. /BDB (BANATNEWS)
- Latest
