TCPS mopadala og pwersa sa Sinulog

CEBU, Philippines – Magpadala og pwersa ang Talisay City Police Station sa Siyudad sa Sugbo alang sa kalihukan sa kapistahan ni Senyor Santo Niño karong tuiga. Kini maoy gibutyag ni Police Major Gerard Ace Pelare, hepe sa Talisay City Police Station.  Hinoon siya nipasabot nga wala pa gyud siya masayud kun pila gyud sa iyang sakop ang madestino sa siyudad samtang padayon pa ang ilang koordinasyon sa ilang labaw nga buhatan.

Siya nagkanayon nga daghan gyud ang katawhan ang modagsa sa Sugbo karong panahona gumikan sa kalihukan sa kapistahan.

Matud niya nga wala sab sila nipalugak sa ilang seguridad gumikan kay ang Dakbayan sa Talisay maoy usa sa mga silingan nga lugar sa Siyudad sa Sugbo nga pwedeng tagoan o istaran sa mga dautang elemento.

Gipalig-on na sab ni Pelare ang ilang intelligence monitoring aron ang adunay plano nga dili maayo ang mapugnga nang daan. Iya sab nga gipasabot nga bisan pa man og mopadala siya sa iyang sakop sa Siyudad sa Sugbo dili ra matandog ang ilang inadlaw nga gimbuhaton.

Pormal nga gipatuman sa kapolisan ang gun ban sa Metro Cebu subay sa Sinulog 2020.

Kini maoy gibutyag ni Cebu City Police Office Director, Police Colonel Engelbert Soriano, human giaprobahan na kini sa Firearms and Explosive Office (FEO) sa temporaryo nga pagsuspenso sa Permit to Carry Firearms sulod sa 12 ka adlaw.

Dugang ni Soriano nga ang tumong ug tuyo sa maong pagpatuman sa gun ban aron malikayan ang kriminalidad ilabi na sa kalambigitan sa armas.

Gihangyo ang tanan nga mga gun holders nga dili magdala og armas gawas sa ilang panimalay kay dakpon ug mag-atubang og tukmang kaso.

Apan giklaro nga ang Metro Cebu lang ang magpatuman niini lakip na ang Dakbayan sa Talisay, Mandaue, Lapu-Lapu, Cebu ug ang Lungsod sa Cordova /GMR (BANAT NEWS)