Mga isla maoy nagrabehan sa bagyo

CEBU, Philippines — Pipila ka mga isla sa amihanang bahin sa Sugbo nga naapektahan sa bagyong Ursula gilibot ni Gobernador Gwendolyn Garcia alang sa inspeksyon ug pagsusi kun unsa ang mga gikinahanglang tabang nga mahatag kanila.

Si Garcia kauban silang kanhi Fourth District Congressman Benhur Salimbangon niduaw sa isla sa Carnaza ug Malapascua nga sakop sa lungsod sa Daanbantayan ug ingon man sa isla sa  Kinatarcan nga sakop sa lungsod sa Sta Fe.

Migawas sa gihimong assessment nga ang maong mga isla maoy nagrabehan sa bagyo.Ang mga isla sa Carnaza ug Malapascua nahatagan na og ayuda sa lungsod inabagan sa Provincial Social Welfare and Development Office (PSWDO) human nga ang konseho niini nakadeklarar niadtong Disyembre 26 og state of calamity.

Sa report sa Sugbo TV, ang official news portal sa Provincial Public Information Office (PIO) miingon nga 90 porsiyento sa mga residente sa maong mga isla o 2,100 sa Malapascua ug 700 sa Carnaza ang naapektahan gyud. Ang mga residente sa Kinatarcan nagpaabot pa og deklarasyon og state of calamity apan gipaabot nga malangay kini ug karon nang sunod tuig sa unang sesyon sa konseho. Matud pa sa Provincial Disaster Risk Reduction and Management Office (PDRRMO), ang Sta. Fe Municipality Disaster Risk Reduction and Management Office (MDRRMO) mirekomendar na sa pagpaubos sa state of calamity ang lungsod.

Wala hinuoy nakalas sa maong bagyo, apan sumala pa sa National Disaster Risk Reduction and Management Council dunay 41 ka tawo nga nakalas gikan sa nagkalainlaing bahin sa Western Visayas gikan sa 2,044 ka mga barangay nga giagian niini ug nagbilin kini og P1.1 bilyon nga danyos.

Ang bagyong Ursula nihinay na ug nakagawas na sa Pilipinas niadtong adlaw nga Sabado ug girumbo ang nasud sa Vietnam. Gikan sa The Freeman/IBM