Kanhi taxi driver, nag-pusher nadakpan

CEBU, Philippines — Usa ka kanhi drayber og taksi ang nadakpan sa gipahigayon nga buybust operation sa mga sakop sa Waterfront Police Station diha sa Sitio Ponce 2 Barangay Carreta, Dakbayan sa Sugbo.

Giila ang dinakpan nga si Quirino Llanado, 46, nagpuyo sa maong lugar.

Matud ni Waterfront Police Station chief, Police Major Joemar Pomarejos sa Banat News, nakadawat sila og impormasyon bahin sa pagpamaligya og shabu ni Llanado.

Giingon nga dinagko kini kun mobaligya og illegal nga drugas mao nga ilaha kining gipanid-an.

Dugang pa ni Pomarejos nga ilang nasayran taud-taod nang mamaligya og illegal nga drugas si Llanado human kini nihunong na sa pagpamasahero sa taksi kay wala na niini mapa-renew ang lisensya pagpamaneho.

Tungod kay nawad-an na og trabaho ug may pamilyang gibuhi nisugal kini sa maong illegal nga negosyo.

Sumala pang Pomarejos, makabalig og 30 gramos ngadto sa 50 gramos nga shabu matag semana si Llanado.

Apan atol sa pagkasikop kaniya P35 mil lang nga kantidad sa gituohang shabu ang nakuha gikan sa iyang posesyon. Gituohan ni Pomarejos nga nakabaligya na kini sa wala pa kini nila masikop.

Kasong kalapasan sa Section 5 ug Section 11 sa RA 9165 ang ipasaka karong adlawa batok ni Llanado. /IBM (BANATNEWS)