P3 milyones shabu nasakmit

CEBU, Philippines — Nasakmit  ang mokabat  sa P3 milyones  nga kantidad  sa shabu  ang nasakmit  sa managlahing  buy bust  operations ug niresulta sa pagkasikop sa napulo ka gidudahang tigpayuhot niini nga naglakip  sa 22  anyos nga taga  dalan P.  del  Rosario  sa Barangay Sambag 2  sa  Dakbayan  sa Sugbo nga nakuhaan og P2.7 milyones nga kantidad sa gidala niining  shabu. Si  Police  Colonel Clarito  Baja  nga maoy  direktor   sa  kapolisan  sa Lapu-Lapu City  Police  Office (LLCPO) mipresentar  ngadto kang Mayor  Junard  Ahong Chan sa ilang nadakpan nga si John Rey  Racasa alyas  Amit.

Si Racasa nadakpan Domingo sa alas-12 pasado sa tungang gabii sa Public Utility Vehicle Terminal sa luyo nga bahin sa City Hall building.

Nasakmit nila kang Racasa ang 400 gramong gidudahang shabu nga mokabat sa P2,720,000  ang kantidad base  sa Dangerous  Drug  Board  (DDB)  value  niini.

“Manawagan ta niadtong mga drug pushers, mga dealers ug mga drug users nga ayaw nalang gyud na ninyo buhata dinhi sa Lapu-Lapu kay wa’y hunong usab ang among pagpanakop ninyo,” ni Mayor Chan pa nga nahinabi  sa mga tigbalita.

Si   Baja  miingon  nga ang ilang sakop  sa City Intelligence Branch (CIB) ug mga sakop  sa  City Drug Enforcement Unit (CDEU) nga gipangulohan ni Police Lieutenant Colonel Mark Gifter Sucalit ug  Police Captain Felix Cleopas maoy nakadakop kang Racasa.

Dugang  pa  ni Baja  nga mibayad  ang ilang  poseur  buyer  og salapi  nga P100,000  alang  sa shabu  nga gipalit niini  nga miresulta   sa pagsasikop   sa maong suspetsado.

Sa Zone 2,  Barangay  Buaya  nadakpan sab si Henry Goc-ong  Flores, 25 nga taga Brgy. Ermita  sa Dakbayan  sa Sugbo ug  Niño  Joven Raran, 24. Ang duha nakuhaan og 16 ka paketeng gidudahang shabu nga mokabat P40,120.

Nadakpan sab sa Punta  Rizal sa Barangay Pajo sila si Jomar  Torres Aringgino, 23, ug  Marlon  Lloyd Angeles   Caña, 24, taga Barangay  Calamba   sa Dakbayan  sa Sugbo ug nasakmit nila ang P68,000 sa shabu.

Laing  nadakpan sila  si Joey  Potariza   Ceniza, 29, ug  kauban niini nga giila nga si  Rey  Anthony Quiñanola  Apa,31, taga Barangay  Lorega  sa Dakbayan  sa Sugbo.

Nadakpan sab si Ristshan Allan  Nodalo,30,  taga Barangay  Ermita   sa Dakbayan sa Sugbo  ug Allan  Seballos  Zapanata. Nakuhaan sila og mga paketeng shabu, buy-bust money, armas nga kalibre  45 nga pistol, kwartang kapin usa ka libo ug buy bust money nga kapin  P100 mil. /IBM (BANATNEWS)