Kwarta sa love offering box sa simbahan gikawat

CEBU, Philippines – Gidala sa wala mailhing kawatan kinsa nilungkab sa simbahan sa Santa Rosa de Lima sa Barangay Poblacion, Lungsod sa Daanbantayan ang kwarta diha sa love offering box.

Si Patrolman Reyman Sitoy sa Daanbantayan Police Station nibutyag nga nahitabo ang maong pagpanglungkab niadtong Lunes sa gabii.

Matud ni Sitoy nga niadtong higayona gipaubos sa public storm signal ang mga lugar lakip na ang amihanang bahin tungod sa bagyong Tisoy ug tungod niini sayo nga nagtapok diha sa sulod sa ilang panimalay ang mga residente sa lugar.

Ang kapolisan nisusi karon sa mga Close Circuit Television (CCTV) camera sa mga establisamento diha sa Barangay Poblacion aron mailhan ang kawatan.

Dugang ni Sitoy nga gibanabana sa kadagkoan sa maong simbahan nga nikabat sa P7,000 ang kantidad sa kwarta ang nadala sa kawatan.  /BDB (BANAT NEWS)