Polis gipasanginlang nanukmag gireklamo

CEBU, Philippines — Usa ka polis ang gireklamo sa usa ka lalaki tungod sa matud pa pagpanapat niini ug pagkuha sa iyang lisensya nga nahitabo niadtong Lunes diha sa D.M.  Cortes sa Barangay Cambaro, Dakbayan sa Mandaue.

Mipadangat  sa iyang reklamao diha sa Presinto 5 sa  Mandaue  City  Police Office (MCPO)  si Jeffrey Epan, 34, family driver nga taga Cordova.Matud ni Police Corporal Ronnie  Padios ang gireklamo, usa ka Police Staff Sergeant Bernilee Simeon kinsa nangangkong nadestino sa Police Regional Office  (PRO)-7.

Matud pa sa alegasyon, kalit gibabagan sa usa ka SUV ang agianan ni Epan maong nagkasingki ang ilang mga bumpers sa sakyanan.

Giingong nanaug ang drayber sa SUV nga nag-uniporme og polis dayong kasaba kaniya ug gisukmag siya kaupat ka higayon diha sa dughan.Gipangayo sa maong polis ang iyang lisensiya ug misakay  og balik sa iyang sakyanan ug mipabulhot paingon  sa Marcelo  Fernan Bridge.

Si Padios miingon nga ilang gitambagan ang biktima sa pagkuha og kopya sa video footage sa Bantay Mandaue Command Center ug ingon man medical certificate sa Mandaue City Hospital.  IBM (BANAT NEWS)