HVT nisukol napatay sa mga polis

CEBU, Philippines — Patay ang usa ka high- value target sa lungsod sa Badian human giingong namusil sa mga pulis atol sa gipahigayon nga follow-up operation sa may Barangay Bugas, sa maong lungsod.

Ang nakalas naila nga si Anecito Buhat, 40, residente sa maong lugar.

Matud pa ni Police Corporal Tirso Sol, Desk Officer sa Badian Police Station, nakig-alayon sa ilang buhatan ang 2nd Maneuver Platoon FMFC human nasikop nila si Ervin Hermosa, didto sa Sitio Cogon Barangay Basdiot Moalboal  tungod sa pagpayuhot og illegal nga drugas.

Atol interogasyon giingong nitug-an kini nga si Buhat maoy source sa iyang gibaligyang drugas hinungdan sa gihimong follow-up operation.

Sumala pa ni Sol, kauban ang mga polis sa lungsod giadto sa grupo ang Barangay Bugas diin gikatahong nagpuyo si Buhat. Apan sa dalan palang nasugatan na sa mga polis si Buhat apan giunhan sila sa pagpusil niini. Walay naigo sa mga polis apan nakabawos dayon sila ngadto sa suspek ug naigo kini sa kalawasan. Patay na pagabot sa tambalanan si Buhat.

Si Sol, nitug-an atol sa pagdala ni Buhat ngadto sa tambalanan, nakakuha ang kapulisan og pito ka mga medium size packs sa gituohang shabu gikan sa namatay.

Samtang sa crime scene  nakuha ang usa ka Colt 45 pistol, motor, cellphone ug uban pa.

Sa pikas bahin, nakaikyas ang usa ka  HVT sa Talisay City atol sa operasyon batok niini diha sa Sitio Mananga 2, Barangay Tabunok niadtong Lunes sa gabii.

Armado og search warrant nga giisyu ni Judge Jacinto Fajardo Jr. sa Regional Trial Court (RTC) Branch 66 sa siyudad sa Talisay giadto nila ang balay ni Gerry Aleser sa maong dapit apan nakabantay kini ug nakaikyas. Bisag nakaikyas na si Aleser gipadayon pagsiksik sa mga polis atubangan sa presensya sa barangay officials sila si Konsehal Chalmer Lastimosa ug Konsehal Vicente Rabaya ang balay sa suspek.

Didto nakuha ang walo ka gagmay ug duha ka medium nga pakite sa shabu nga may gibug-atong 10.24 gramos. Tungod niini, bisan nakasibat pa si Aleser  pasakaan gihapon kini og kaso.(/IBM)(BANATNEWS)