Sidewalk vendors naglaum makabalik
CEBU, Philippines — Padayong nangandoy ang mga sidewalk vendors sa Siyudad sa Sugbo nga makabalik sa ilang pagpaninda sukad sila gipapahawa sa ilang pwesto.
Ang mga sakop sa United Small Vendors and Traders of Cebu City (USVTCC) ug Colon Sidewalk Vendors Association (CSVA) niadto sa opisina ni Konsehal Alvin Dizon kagahapon aron masayod kabahin sa ilang hangyo. Si Wilma Cabog, sakop sa CSVA, niingon nga human sila gibalhin sa Tabo sa Banay sa dalan P. Gullas, minus na ang ilang halin.
"Lisud ang among kahimtang karon. Galibog nami unsay among buhaton. Tanan na lang among giduol para lang jud matabangan mi," matud ni Cabog.
Giduol na nila si Mayor Edgardo Labella kinsa niingon kanila nga makabaligya sila pag-usab human sa mga stalls nga gilaraw ni Kenneth Cobonpue.
Dugang pa ni Cabog nga kung hatagan sila og higayon nga makabalik sa ilang mga orihinal nga luna, mosaad sila nga dili sila mahimong hinungdan sa mga babag.
"Ang amo lang ipaapil mig develop... kung unsay kanindot sa atong syudad, ipaapil mi sa kanindot sa syudad. Kay nanginabuhi intawon mi. Naa mi kinabuhi," segun ni Cabog.
Si Dizon niduso og resolusyon nga mag-awhag kang Labella nga magbuhat og usa ka long-term strategy alang sa kaayuhan sa mga tindera sa siyudad nga naapektaran sa pagpanglimpyo sa mga karsada. (/GMR)(BANATNEWS)
- Latest
