Dul-an P5 milyones shabu nasakmit sa PDEA ug CCPO
CEBU, Philippines — Dul-an sa P5 milyones nga balor sa drugas ang nasakmit sa mga tinugyanan sa Philippine Drug Enforcement Agency gikan sa duha ka mga dinakpan sa may Barangay Duljo Fatima sa Dakbayan sa Sugbo Miyerkules sa hapon.
Ang mga nasikop mao sila si Ariel Villanueva, 19, ug Mico Calero, 18, mga residente sa maong lugar.
Nasakmit gikan sa mga dinakpan ang 40 ka putos sa gituohang shabu nga motimbang og 730 gramos nga mobalor og P4,964,000 base sa Dangerous Drug Board Value, usa ka cellphone, duha ka bag, 2,350 nga cash ug boodle money.
Matud pa ni Leia Albiar-Alcantara, tigpamaba sa PDEA7, dul-an sa usa ka semana ang gipahigayon ang case build up sa ilang team ayha pa gihimo ang operasyon.
Sumala pa ni Alcantara, tagsa ka kilo sa ginadiling drugas matag semana ang mabaligya sa duha. Sa laing operasyon, wa ka ugpo ang usa ka John Edward Larosa Makachor ,37, nga usa ka parking boy sa operasyong gilusad sa mga sakop sa Criminal Investigation Branch sa Cebu City Police Office diha sa Brgy. Tejero.
Ang operasyon gipangulohan ni Police Major Randy Caballes diha sa Sitio Pipang, Brgy. Tejero nga niresulta sa pagkasakmit sa walo ka gramong gidudahang shabu ug usa ka .38 rebolber nga adunay tulo ka bala. Si Makachor anaa sa drugwatch list ug dugay nga gipanid-an sa kapolisan.(IBM)(BANATNEWS)
- Latest