Establisamento giingong nibabag sa ASF Task Force
CEBU, Philippines — Usa ka establisamento og karne sa Dakbayan sa Mandaue ang gikataho nga nagdumili sa pagpasakmit sa ilang mga karneng baboy nga gikan sa Luzon sa Cebu Provincial Asian Swine Fever Task Force.
Matud ni Dr. Mary Rose Vincoy, Cebu Provincial Veterinarian nga ang Baliwag Liempo wala motugot sa task force sa pagsakmit sa mga karneng baboy nga gikan sa Luzon nga gipamaligya niini.
Ang maong establisamento giingong nipasalig nga limpiyo ang ilang mga karneng baboy ug wala kini matapti og African Swine Fever (ASF).
“Di man mosugot nga i-confiscate kay limpiyo daw kuno to, but sa Executive Order 16, basta processed, canned or unsa nga baboy, kinahanglan siya dapat i-confiscate”, matud pa ni Vincoy.
Atol sa operasyon sa ASF Task Force niadtong Oktubre 16, duha ka grupo ang nagpahigayon og buwag nga operasyon sa Dakbayan sa Lapu-lapu ug Lungsod sa Cordova ug sa Dakbayan sa Mandaue.
Atol sa pag-inspeksiyon sa Baliwag Liempo sa Mandaue nasuta sa task force nga ang establisamento kulang kini og dokumento sa ilang gi-display nga karne.
Ang task force nihimo og pakisusi sa lugar ug nadiskubrehan nila ang 1.2 ka toneladang karne nga baboy ug manok diha sa freezer nga giingong gikan sa Pasig City.
Ang mga sakop sa Special Weapon and Tactics (SWAT) gi-deploy diha sa lugar human nga giingong ang tagdumala sa establisamento nagdumili sa pagkooperar sa task force.
Ang nahisgutang mga karne nga gikan sa Luzon ang gipangkompiska kini.
Ang nahisgutang establisamento giingong niduso kini og hangyo ngadto sa buhatan sa gobernador nga unta ibilin ang mga karne sa manok.
“Ingon sila, Certificate of Meat Inspection kay… imported daw ilang mga products. Pero sa ato man gud, we follow the Executive Order 16 so whether there is a co-mingling or not basta gikan siya sa Luzon… banned siya. Dapat siya i-confiscate”, dugang ni Vincoy. (BANAT NEWS)
- Latest