De Leon gikatakdang molingkod na sa PRO-7
CEBU, Philippines – Pormal na nga gitudlo si Police Brigadier General Valeriano De Leon isip direktor sa Police Regional Office (PRO)-7 kaniadtong Martes hulip kang Police Brigadier General Debold Sinas.
Ang officer-in-charge sa PRO-7 Police Colonel Ildebrando Usana nibutyag nga niadtong Martes sa gabii adunay gipahigayong command conference ang PNP uban kang Presidente Rodrigo Duterte didto sa Malacañang diin human niini nahukmang si De Leon ang itudlong hulip kang Sinas.
Si Usana nagkanayon nga nangandam na sila alang unya sa turnover ceremony ug si General Archie Gamboa gikataktang guest of honor sa maong kalihukan.
Si De Leon sakop kini sa Philippine Military Academy (PMA) Class 1989 ug kasamtangang hepe sa PNP Firearms and Explosives Office.
Gibutyag usab ni Usana nga nahimamat niya kaniadto si De Leon dihang nadestino pa siya sa Civil Service Security Group ug si De Leon maoy hepe sa FEP.
Matud ni Usana nga kasagarang assignment ni De Leon ngadto sa Luzon ug Mindanao.
“To my memory hindi ko pa nalalaman kung siya’y meron nang experience in getting to Cebu, kung ang pagiging opisyal dito sa Cebu, hindi pa po siya nagkaroon ng experience”, padayag ni Usana.
Si De Leon nadestino kaniadto sa PRO-11 sa Davao isip deputy regional director for operations.
Niadtong tuig 2016, si De Leon gihatagan kini og Medalya ng Kasanayan ug achievement award isip usa sa labing maayo nga Senior Police Commissioned Officer of Administration. “Visionary sya… I assume that he would be introducing more positive changes maybe in the context of administrative management over our personnel”, dugang ni Usana. (/BDB)(BANAT NEWS)
- Latest
