‘Tambayan sa Lacion’ nasunog

CEBU, Philippines — Mokabat sa P200,000 ang gibilin nga danyos sa tulo ka stalls nga kan-anan nga nahimutang sa Tambayan sa Lacion Food Park sa Barangay Pitogo, Consolacion.

Si Fire Officer 1 Jaypee Ango sa Consolacion Fire Station nibutyag nga gialarma ang maong sunog sa ilang buhatan alas 3:30 sa niaging Martes sa kaadlawon.

Matud niya nga nagsugod sa pagdilaab ang kayo sa ikatulong andana dapit sa wala nga bahin sa food park ug dali kaayo nga nitapon sa laing stall una pa napawong sa mga bomber.

Dugang pa ni Ango nga ang maong mga kan-anan nga nahimutang sulod sa usa ka container van ang nabahin sa upat ka stalls nga pulos mga ginama sa mga light materials.

Hingpit nga gipaubos sa under control ang kayo alas 3:35 sa kaadlawon ug ilang gideklarar nga napawong na alas 3:50 na sa kaadlawon.

Si Ango niingon nga sa ilang pakisusi maoy ilang nasuta nga ang nataligam-an nga giluto sa usa sa mga nag-abang og stalls maoy hinungdan sa kalit nga pagsilaob sa kayo ug walay naangol o kinabuhing nakalas atol sa maong hitabo. GMR (BANAT NEWS)