Laing traffic scheme posibleng ipatuman sa Mandaue

CEBU, Philippines — Giisip nga malampuson ang  gipahigayon nga dry run sa traffic scheme sa buhatan sa Traffic Enforcement Agency of Mandaue (TEAM).

Tumong niini mao ang pagpaloag  sa dagan  sa mga sakyanan sa UN  Avenue  sa Barangay  Umapad ug  D.M. Cortes sa Barangay Alang-Alang sa Dakbayan sa Mandaue. Si  Arnold Malig-on  sa  buhatan  sa TEAM sa Dakbayan sa Mandaue nibutyag nga base  sa ilang pag-aninaw sa dagan sa mga sakyanan  nga molabay diha sa U.N. Avenue  ilang namatikdan nga niloag  ang gidaghanon  sa  mga  sakyanan nga mopaingon ngadto sa Marcelo Fernan  Bridge.

Matud ni Malig-on nga nasulbad ang panaghuot kaniadto  sa mga sakyanan nga molabay  diha sa U.N. Avenue nga mopaingon diha sa Dakbayan  sa Lapu-Lapu apan ilang namatikdan nga nakasinati usab  og kahuot ang uban nga mga dalan.

Naglakip niini ang dalan sa M.C. Briones nga nakapekto usab sa uban pa nga mga  sa Hernan  Cortes  Avenue,  A.S. Fortuna ug M.L.  Qujezon sa Maguikay  sa maong dakbayan.

Giplano  karon sa TEAM ang posible  nga pagpatuman og laing traffic scheme sa maong mga dalan  nga naglakip na niini ang pagahimuon nga one way alang sa molabay nga mga PUJ.

Sa nasayran  nga  ang buhatan  sa TEAM nagsugod  sa ilang dry run sa gipatuman nilang traffic  scheme niadtong Septiyembre 22 , 2019. Ang mga traffic  enforcer, mga barangay tanod ug radio communication groups  ang nagtinabangay sa paghapsay sa dagan  sa mga sakyanan ug ingon man gipatuman usab  ang  synchronization sa mga traffic lights  sa maong mga dalan. BDB (BANATNEWS)