Plantasyon sa marijuana

CEBU, Philippines – Gibanabanang  P36 milyones nga balor sa mga dagko ng tanom nga marijuana ang nadiskubre human ang pila ka adlaw nga pag monitor niini sa 2nd PMFC ug sa Toledo Police Station niadtong Huwebes sa buntag sa Sitio Carbon, Barangay Pangamihan, Toledo City, Cebu.

Matud pa nga nadiskubrehan kini dihang ang usa sa ilang mga police intelligence officer nakabantay og grupo sa mga armadong lalaki nga naglibot-libot sa Barangay Biga, Bagacay ug Panganiban.

Tungod niini, naghimo sila og hilom nga imbestigasyon ug pagpaniid sa grupo pinaagi sa grupo ni Police Captain Mikhail Mallorca ug kapolisan sa Toledo City Police Station.

Hangtud nga natultolan nila ang hilit nga dapit ug didto nakita ang plantasyon sa marijuana. Gibana-bana nga moabot sa lima ka hektarya ang plantasyon.

Ang kapolisan milarot sa dili muminus sa 90 mil ka punoan sa mga tag-as na nga punoan sa marijuana nga gibanabanang mokantidad karon og P36 milyones.

Ang mga nakuhang marijuana gisunog dayon sa operating team diha sa lugar tungod kay dili nila kini nadala ug nikuha nalang sila og gamay aron ipresentar isip ebidensya ug ipasusi sa PNP Crime Laboratory-7.

Wala pa mailhi sa kapolisan kun kinsa kadtong mga armadong mga lalaki nga gituohang maoy nananom sa maong mga illegal nga tanom.

Daan ng nahisgotan sa miaging mga report niinin lang bulana ni Police Provincial Director, Police Colonel Roderick Mariano nga adunay mga gidudahan nilang lagpad nga marijuana plantations nga ilaha karong gipanid-an ug gisubay.

Sa laing bahin, upat ka tawo ang gidakop sa managlahi nga buy bust operation nga gihimo sa mga sakop sa Philippine Drug Enforcement Agency 7 sa Dakbayan sa Sugbo.

Sa operasyon sa Sitio Arco, Barangay Lahug, nasikop sila nsi Julrex Absina,35, nga us aka scaffolding installer ug Jayson Alistre,33, nga food handler, apan giingong mga sakop og dakong grupo sa mga nalambigiti sa illegal nga drugas dinhi sa Sugbo.

Nasakmit gikan sa duha ang 10 gramos nga gidudahang shabu.

Sunod nga nadakpan diha sa Sitio Mahayahay sa A. Lopez Street, Barangay Calamba si Benjamin Alcordo, 28, ug sa kapuyo niini Maricar Pilapil, 21. Si Alcordo giingong sakop sab sa usa ka drug group. Nakuha gikan nila ang 30 gramos nga gidudahang shabu.

Matud pa ni Leia Albiar-Alcantara, tigpamaba sa PDEA 7, base sa ilang nakuhang impormasyon ang upat pulos makadispatsar og dinaghang shabu matag semana. (Rowena Capistrano/IBM)(BANAT NEWS)