Pagdispatsar sa drugas sutaon ni Labella
CEBU, Philippines – Makigtagbo si Cebu City Mayor Edgardo Labella sa kadagkuan sa Philippine Drug Enforcement Agency 7 ug Philippine National Police labot sa pagdispatsar sa mga masakmit nga ginadiling drugas.
Kini human ang konseho sa siyudad nihangyo sa PDEA ug PNP sa pagduso og inventory sa mga ilegal nga drugas nga nasakmit sa niaging lima ka tuig.
Ang tigum himoon sa Cebu City Hall ug tambungan sa kadagkuan sa PDEA, PNP ug mga huwes nga nagkupot sa mga kaso may kalambigitan sa ginadiling drugas.
Matud ni Labella nga pinaagi sa maong tigum masayran nga kung unsaon ang pagdispatsar sa mga nasakmit nga ginadiling drugas.
Matud ni Konsehal Antonio Cuenco nga ang masakmit nga ginadiling drugas kinahanglang bungkagon ug idispatsar sulod sa 72 oras sa pagdawat sa mando sa korte subay sa Republic Act 9165 o ang Comprehensive Dangerous Drugs Act 2002. Sumala ni Cuenco nga tuyo sa balaud diin siya ang main author didto sa Kongreso nga malikayan ang isyu sa planting ug pag-recycle sa masakmit nga ilegal nga drugas.
Matud ni Cuenco nga ang PDEA ug PNP dili na maghuwat og court order apan mosang-at og motion for the destruction of drugs.
Ang konseho nihatag sa PDEA ug Police Regional Office 7 og duha ka semana sugod niadtong Septiyembre 24 sa pagduso sa inventory. (Gikan sa The Freeman/GMR)
- Latest
