‘Haze’ peligro sa mga hubakon

CEBU, Philippines – Peligro ang nasinating “haze” sa mga tawo nga dunay hypersensitivities ilabi na kadtong mga hubakon, sumala pa ni Department of Health 7 Regional Director, Dr. Jaime Bernadas.

Nunot niini si Bernadas niingon nga mas maayo nga palig-onon gyud ang defense system sa lawas pinaagi sa pagkaon og sakto nga maghatag og bitamina ug supplements nga makatabang aron batukan ang mga sakit ug kining viral upper respiratory infections ilabi na karon nga usab-usab ang panahon, moinit ug dunay higayon nga mokalit ra sab og bugnaw.

Likayan sab nga ma-expose ang kaugalingon ilabi na kadtong mga dunay pulmonary problems o hypersensitivities ug magsul-ob gyud og protective mask.

Ang sakto gyud nga gamiton isip panagang sa abog nga dala sa haze mao ang N95 mask tungod kay mas efficient kini nga mo-filter sa harmful substance, viruses ug micro-organisms.

Gipasabot ni Bernadas nga ang N95 mask disposable siya tungod kay kun gamiton kini nga sobra sa prescribe time nga gihatag hayan matapok ang micro-organism nga maghatag hinoon og risgo.

Ang Environmental Management Bureau 7 niawhag sa publiko nga likayan una ang pagpahigayon og outdoor activities tungod sa haze maong dunay pahimangno si Bernadas sa mga atleta aron makapadayon sila sa ilang mga training. “Those that would really need a strenuous training you rather go uphill rather than downhill because you know the pollutants in the air has a higher   density it settles down at lower level so it’s better at a higher level at least lesser and contaminants sa air, you can proceed with the training maybe at a higher altitude,” pahimangno ni Bernadas. Samtang ang konseho sa Siyudad sa Sugbo niawhag sa mga awtoridad nga maghimo og mga lakang aron mahanaw ang epekto sa haze. Usa ka resolusyon ang gipasar atol sa sesyon kagahapon nga gipangamahanan  nila ni Konsehal Alvin Dizon ug Joel Garganera.

Ang resolusyon nag-awhag sa Association of Barangay Councils sa siyudad nga makigtambayayong sa City Health Department aron magpahigayon sa information campaign sa mga residente.

Giawhag sab sa konseho sa siyudad ang mga empleyado sa City Hall, tanang barangay ug mga panimalay sa paghimo og tukma nga lakang nga malikay sa sakit tungod sa haze. (Jean Marvette A. Demecillo/GMR)(BANAT NEWS)