Duha patay sa pusil ug dunggab

CEBU, Philippines — Duha ang patay sa buwag nga pagpamusil ug pagpanunggab sa habagatang bahin sa Sugbo. Usa kanila mao ang maguuma sa Barangay Ablayan, Dalaguete niadtong Biyernes sa gabii.

Ang namatay giila nga si Juanito Rabutin  Estorco,31, residente sa maong dapit. Matud pang Police Corporal Rex Telonyo, Desk Officer sa Dalaguete Police Station dugay napahibalo kanila ang alarma tungod kay way signal sa cellphone ang lugar.

Sumala pangTelonyo, si Estorco lumad nga taga Jimalalud Negros Oriental. Naigo kini sa walang mata ug agtang nga nakaingon sa iyang hinanaling kamatayon.

Way nakuhang basiyo sa bala sa crime scene. Samtang padayon pa ang imbestigasyon sa kapolisan sa motibo sa maong pagpatay.

Usa sa ilang gisusi mao nga posibleng dunay nakaaway ang biktima ug gipanimaslan kini.

Ang maong barangay usa sa kinatumyan na sa bukirong utlanan sa maong lungsod mao nga lisud ma-monitor ang lugar ilabi na ang 21 lamang sila ka polis sa lungsod, apan bisan pa niini kada adlaw nga dunay nagpatrolya didto.

Sa laing pagpatay, usa ka  Nelson Paner Tausa, 32, nga trabahante sa construction firm ang gitusaktusak og dunggab sa wala pa mailhing mamumuno diha sa Sitio Kabulihan, Barangay Anislag, Pinamungajan.

Ang biktima giingong taga San Fernando namista sa utlanang barangay sa Pinamungajan sa Barangay Anislag ug didto duna kini nakabikil nga wala mailhing lalaki ug nadunggaban makadaghang higayon.

Walay saksi nga niduol sa kapolisan aron paghatag og impormasyon kun si kinsa ang nagpatay sa biktima. (Dina Atip ug report gikan sa The Freeman/IBM)