Babaye nga HVT sikop sa buy-bust

CEBU, Philippines — Usa ka giingong high value target (HVT) ang nasikop atol sa gipahigayong buy-bust operation sa City Intelligence Branch (CIB) sa Cebu City Police Office kagahapon sa hapon diha sa Sitio Mahayahay, Barangay Calamba, Dakbayan sa Sugbo.

Ang suspetsado mao si Damiana Aniñon alyas “Damie”, 56-anyos, minyo, residente sa maong lugar ug maoy subject sa nahisgutang buy-bust operation ug giingong usa ka HVT sa area sa Police Station 6.

Giingong nakuha gikan sa suspetsado ang nagkadaiyang pakete sa shabu nga nitimbang tanan sa 40 gramos ug mobalor sa P300,000.

Matud sa pangulo sa City Intelligence Branch Police Major Randy Caballes ang ngalan ni Aniñon nitumaw gikan sa ilang mga dinakpan kaniadto.

Matud ni Caballes nga ang suspetsado giingong taud-taud na kini sa iyang ilegal nga kalihukan.

Nasuta nga si Aniñon giingong maka-dispose kini og 150 ngadto sa 200 gramos nga shabu sulod sa usa ka semana.

Ang kapolisan nagpahigayon og pagpaniid kang Aniñon sulod sa lima ka adlaw una pa sila nipahigayon og buy-bust batok sa suspetsado

Gisubay na karon sa kapolisan ang tinubdan ni Aniñon sa ginadiling drugas.

Si Aniñon nagtingkagol karon sa detention cell sa Cebu City Police Office.  (/BDB)(BANATNEWS)