Laing abogado Gihulga

CEBU, Philippines – Giawhag sa Cebu City Police Office ang mga hingtungdan nga nakadawat og hulga sa ilang kinabuhi nga motaho sa ilang buhatan ug dili kutob lang sa social media.

Matud ni CCPO director, Police Col. Gemma Cruz-Vinluan, nga dili nila i-tolerate ang mga extortion ug ang mga hulga ngadto sa mga sakop sa judiciary kay ila gyud kining pangitaan og mga pamaagi nga masikop ang mga nagpaluyo niini. Alang kang Vinluan nga dili tukma ang social media nga maoy sumbongan sa mga hulga aron masusi kini sa kapolisan diin posibleng dunay uban niini ang nisakay lang sa panahon. Dugang ni Vinluan nga maglisud gyud sila ang kapolisan sa pagsulbad sa mga problema kung walay kooperasyon sa katawhan. Ang pamahayag ni Vinluan giluwatan human tulo ka abogado ang nakadawat og tawag gikan sa susamang numero sa cellphone ug nagpahibawo kanila nga nalakip sila sa tumbahonon ug makalingkawas lang sila sa higayon nga mohatag sila og P100,000.

Si Atty. Magdalena Daymeg Lepiten nakadawat og tawag gikan sa nagpailang Bobby nga taga Davao.

Ang tawag nakapabalaka kang Lepiten ilabi na nga human kini sa pagbanhig kang Atty. Inocencio Dela Cerna kinsa nakasukol sa mga nibanhig kaniya.

Apan si Lepiten nanawagan sa iyang kaubanang abogado nga dili magpadala sa kahadlok ug ipadayon ang ilang trabaho. Si Lepiten nagtinguha nga moapil sa Learn to Shoot Back Basic Gun Handling and Gun Safety Seminar alang sa mga abogado karong Septiyembre 15 nga pasiugdahan sa Integrated Bar of the Philippines-Cebu Chapter, Young Lawyers Association-Cebu Chapter ug Cebu Lady Lawyers Association. Ang kapolisan sa Dakbayan sa Sugbo naglisud sa imbestigasyon sa pagbanhig kang Dela Cerna human wala pa kini mohatag og official affidavit.

Hinoon si Vinluan nakasabot sanglit normal nga anaa pa sa traumatic situation si Dela Cerna.

Malaumon si Vinluan nga makakuha na sila og mga impormasyon gikan kang Dela Cerna sanglit importante kaayo kini alang sa pagsugod sa imbestigasyon. (Rowena D. Capistrano/GMR)

4 departamento sa Kapitolyo division na lamang

Hingpit na nga napirmahan ni Gob. Gwendolyn Garcia ang ordinansa nga nag-downgrade sa upat ka departamento sa Kapitolyo isip division na lang sa buhatan sa gobernador sugod Septiyembre 1.

Ang mga departamento mao ang Cebu Provincial Anti-Drug Abuse Office (CPADAO), Provincial Disaster Risk Reduction and Management Office (PDRRMO), Provincial Tourism Office ug Cebu Provincial Investment and Promotions Office (CPIPO).

Nunot niini 34 ka empleyado gikan sa maong mga buhataan ang apektado kinsa gitun-an karon sa giumol nga placement committee subay sa Republic Act 6656 o ang “Act To Protect the Security of Tenure of Civil Service Officers and Employees in the Implementation of Government Reorganization”.

Matud ni Garcia nga ang maong mga empleyado hatagan higayon nga maka-apply sa 24 ka posisyon nga buksan alang sa maong mga division. Ang dili na mabutang sa posisyon ang bayran sa gobiyerno sibo sa usa ka buwan nga sweldo matag tuig nila nga serbisyo sa maong mga buhatan subay sa balaud. (/GMR)(BANAT NEWS)