Baha gipangitaan og sulbad

CEBU, Philippines —  Kapin sa P2.5 bilyones gastuhon sa kagamhanan sa Siyudad sa Sugbo ug Department of Public Works and Highways aron masulbad ang nagkagrabe nga problema sa baha.

Kagahapon nipatawag si Mayor Edgardo Labella og tigum sa mga opisyal sa Department of Engineering and Public Works, DPWH-Cebu City District Engineering Office ug ubang departamento aron hisgutan ang mga solusyon sa suliran sa pagbaha nunot sa nasinati niadtong Domingo sa downtown area.

Nasayran ni Labella nga adunay P1.5 bilyones nga kantidad nga proyekto alang sa pagsulbad sa baha ang wala pa magamit ubos sa 2015 annual budget.

Matud ni DPWH District Engr. Florida Nuñez nga ang opisina adunay nagpadayon nga mga proyekto sa pagkontrol sa baha nga naglakip sa P1.2 bilyones nga Bulacao River Improvement, P575 milyones nga Lahug River Improvement, P532 milyones nga Tejero Creek Improvement, P700 milyones nga Guadalupe River Improvement; ug uban pa.

Si Labella nag-umol dayun og usa ka inter-agency task force aron pagtan-aw sa mga proyekto nga gipundohan sa nasudnon ug lokal nga kagamhanan.

Gidapit usab ni Labella ang DPWH-CCDEO nga motabang sa paglimpyo sa Subangdaku River o Mahiga Creek karong Septiyembre 14.

Sa Dakbayan sa Mandaue, giawhag sa konseho pinaagi sa resolusyon ni Konsehal Jimmy Lumapas ang buhatan ni Mandaue City Engineer Andres Suson nga hatagan og kasulbaran ang dugay na nga suliran nga pagbaha sa dalan Juan M. Ceniza sa Sitio Superior, Barangay Looc.

Matud ni Lumapas nga isip chairman sa committee on transportation sa konseho, iyang nakita ang dakung kapuslanan sa maong dalan sanglit magsilbi kining access road sa mga sakyanan gikan sa A. Soriano Ave. paingon sa Dakbayan sa Lapu-Lapu.

Aspaltado na ang maong dalan apan naguba tungod sa baha ug dili na maagian sa mga sakyanan.

Lakip sa nahasol ang mga molupyo sa lugar sanglit kanunay man sila moubog sa baha. (GMR) (BANATNEWS)