Bagong merkado sa Mandaue buksan na

CEBU, Philippines – Gitakda na  karong hapon  ang pagbukas sa bag-ong gitukod nga merkado publiko  sa Dakbayan  sa Mandaue nga nahimutang  diha sa luyo nga bahin sa National Shrine of Saint Joseph sa Barangay  Centro.

Si  Konsehal  Jimmy Lumapas, chairman sa committee on market sa konseho sa maong dakbayan nagkanayon nga ang hingpit nga pagbukas alang sa pagladlad sa mga baligya sa mga manindahay ang natigayon human sa gihimo nga mga  paghapsay niini.

Matud ni Konsehal  Lumapas nga ilang gibase sa ilang ordinansa ang kantidad sa pag-abang sa matag stall nga ukopahon  sa mga manindahay sa bag-ong merkado publiko  sa dakbayan.

Ang bag-ong merkado publiko gilangkuban kini sa kapin 1,000 ka stall diin P36  ngadto sa P100 ang  matag adlaw nga abang niini. Sa dry section sa merkado ang pweding ibaligya mao ang mga grocery nga naglakip sa bugas, linata nga pagkaon, mga tsinelas, sapatos, ready to wear nga mga sapot ug mga panapton.

Samtang ang wet section nga mga stall gilangkuban sa isdaan, karnehan ug lain usab ang mga stall alang sa baligya nga bulad ug mga utanon.

Sa gihimo nga pagripa sa niaging  adlaw nikabat ngadto sa 800 na ka manindahay ang nakaandam na sa pagladlad sa ilang mga baligya nunot  usab sa hingpit na nga pagbukas sa bag-ong merkado.

Si Mayor Jonas Cortes ug Bise Mayor Glenn Bercede uban sa mga sakop sa konseho maoy mangulo sa hingpit nga pagbukas niini nga pagatambongan usab sa pipila ka dinapit nga bisita nga naggikan sa buhatan sa Department of Agriculture,   (DA)-7   Department of Trade and Industry (DTI) ug uban pa. (/BDB)(BANAT NEWS)