Dulan P6 milyones shabu nasakmit sa kapolisan
CEBU, Philippines — Dulan P6 milyones kapin o kulang nga balor sa illegal nga drugas ang nasakmit sa mga tinugyanan sa kapulisan sa Dakbayan sa Sugbo atol sa ilang buwag nga mga operasyon wala ray 24-oras.
Unang operation nahitabo sa may Sitio Bato, Barangay Ermita, nga gikasikop ni Ludevico Abadiez, 39, kinsa nakuhaan og pinutos sa ginadili nga drugas nga motimbang og 520 gramos nga mobalor ug 3,536,000.00 base sa Dangerous Drug Board Value ug usa ka kalibre 45 nga armas.
Nangulo sa maong operation mao si Police Major Kenneth Paul Albotra, pangu sa Sawang Calero Police Station ug mga mga kaubanan.
Nasayran sa kapulisan nga si Abadiez nalakip sa watch list sa rehiyon human makapagawas kini ug tagsa ka kilo matag semana o kaha mosubra pa.
Laing nadakpan sa grupo nilang Albotra sa may L. Flores, Barangay Pasil, kaadlawon sa adlaw nga Sabado si Jesse Chris Tura, usa ka High Value Target. Nakuha gikan kaniya ang duha ka dakong putos sa drugas nga mobalor og dul-an sa P1.1milyon.
Samtang sa operasyon sa mga operatiba sa Waterfront Police Station sa may Barangay Tejero, nadakpan sila si Arvin Barentos, 38, taga Minglanilla, ug Weamsy Bayang, 20, taga Barangay Guadalupe, Cebu City.
Nangulo sa maong operation mao si Police Major Jomar Pomarejos ug nasakmit gikan sa duha ang 300 gramos nga gidudahang shabu nga mobalor og dul-an sa P2 milyones.
Ang mga dinakpan nagtingkagol na karon sa prisohan ug pasakaan og kaso karong adlaw nga Lunes. (/IBM)(BANATNEWS)
- Latest
