P250 milyong budget alang sa modernong traffic system
CEBU, Philippines — Niduso si Cebu City Mayor Edgardo Labella og P250 milyones nga supplemental budget alang sa modernong traffic system. Matud ni Labella nga kinahanglang i-upgrade ang sobra na sa 30 ka tuig nga sistema sa trapiko nga gitawag og Sydney Coordinated Adaptive Traffic System (SCATS).
“I still have to go over them. We have to review. But, I think, the P500 million is the same amount that the previous administration asked,” matud sa mayor.
Ang Cebu City Transportation Office una na nga nibanabana sa labing minus P500 milyones aron ma-upgrade ang sistema sa trapiko sa siyudad.
Karong semanaha adunay 14 ka eskina sa Dakbayan sa Sugbo ang naguba ang traffic system nga nakaapekto sa dagan sa trapiko. Bisan dili pa kompleto ang budget nga P500 million, matud ni Labella nga mas maayong masugdan na ang pag-upgrade sa traffic system sa siyudad.
Gihangop ni Andres Bayarcal, operations head sa CCTO, ang dali nga pag-aprobar ni Labella sa sugyot sa iyang opisina. “Karaan na gyud kaayo atong traffic system. Lapas 30 ka tuig na gyud ni. Karon, magsige pa mi og pa-deploy og personnel kay mokalit og kausab ang flow niya,” dugang niya. Giingon ni Bayarcal nga ang mga suga sa trapiko, mga kontrol, ug digital board sa kasamtangang sistema ang kanunay maguba mao nga kinahanglan abagan sa mga traffic personnel.
Gipasabot niya nga ang mga traffic personnel magamit na unya sa operasyon batok sa ilegal nga parking kun maabot na ang bag-ong traffic system.
Walay tulo ka oras ang nilabay kagahapon, si Bayarcal niingon nga naka-clamp sila og 126 ka awto nga ilegal nga gi-parking sa mga kadalanan ug mga sidewalk.
Sigun niya nga mao kini ang mando ni Labella ug direktiba ni Presidente Rodrigo Duterte nga limpyohan ang kadalanan sa bisan unsa nga nakaali niini. (/GMR)(BANATNEWS)
- Latest
