Ex-seaman gipatay, wa ilhing lalaki gi-salvage
CEBU, Philippines – Patay ang usa ka kanhi Overseas Filipino Worker, human kini gipusil samtang nagmaneho sa iyang sakyanan kuyog sa iyang mga gagmay nga anak padulong unta sa tunghaan sa may Soong 1, Barangay Mactan, Dakbayan sa Lapu-Lapu, Huwebes sa buntag.
Ang nakalas naila nga si Gil Antonio, 57, taga Barangay Mactan.
Matud pa ni Police Master Sergeant Raymond Sosmeña, sa Mactan Police Station kalit gisikitan og riding in tandem ang multicab niini ug gipusil kini sa ulo nga nakaingon sa iyang kamatayon.
Wala ra maunsa ang mga anak sa biktima. Gisusi pa sa kapolisan ang motibo sa maong pagpatay. Sa pikas bahin, usa ka wala mailhing lalaki ang napalgang patay nga adunay daghang samad pinusilan sa kalawasan diha sa Sitio Capasanan sa Barangay Casili, Dakbayan sa Mandaue Miyerkules sa gabii. Ang biktima gitaptapan og tualya nga dunay nakaimprintang pangalan sa usa ka politiko. Si Police Corporal Ryan Diamada sa Presinto 6 sa Mandaue City Police Office (MCPO) wala pa matino kun diha ba gipatay o gilabay lang sa maong lugar ang biktima. Ang biktima gibanabanang 30 ngadto sa 36 anyos, gamayon og lawas, pamarog nga 5’ 3”, nagsul-ob og yellow t-shirt, maong ang karsones , ug nag-tsinelas. (Rowena Capistrano/IBM)(BANAT NEWS)
- Latest