Laing duha biktima sa investment scam

CEBU, Philippines — Laing duha ka trabahante sa usa ka health insurance company ang nireklamo sab sa buhatan sa Regional Anti-Cybercrime Group 7 nga nabiktima sab sila og investment scam nga gihinganlan og Positive Life.

Ang nagpailang founder sa maong kompaniya mao si Karen Tan kinsa nisaad nga modoble ang ilang kwarta sulod lang sa unom ka adlaw.

Tuod man nihulog og kwarta ang mga biktima pinaagi sa bangko ug sa usa ka mobile money service apan wala sila kadawat sa gisaad sa suspek.

Apan sa dihang gi-hacked sa usa sa mga biktima ang social media account ni Tan, nadiskubrehan nila nga dummy account ra kini ug ang tinuod nga pangalan sa suspek mao si Airen Himungala.

Nunot niini, pasakaan na nila og kaso ang suspek aron madakpan na.

Sigun ni Abatayo nga kun mapasaka na nila ang kaso makapangayo na sila og court order nga ablihan ang bank account nga gigamit sa suspek diin maoy hulogan sa kwarta sa mga biktima.

Base sa Bank Secrecy Law, dili basta-basta malili ang bank account sa usa ka indibidwal.

Samtang makig-alayon ang RACG-7 sa remittance center ug sa bangko nga maoy gigamit sa mga nabiktima sa “double your money scam” sa pagpadala og kwarta ngadto sa nangilad nila.

Ang imbestigador sa RACG-7 nga si Police Staff Sergeant Henry Abatayo nagkanayon nga lakip kini sa ilang imbestigasyon sa pag-ila sa mga suspek.

Niadtong Lunes nireklamo ang unom ka nagpailang biktima sa investment scam nga gitawag og Phoenix Trading.

Susama sa ubang investment scam, usa ka nagpailang Ailen Villazar nisaad sa mga biktima nga modoble ang ilang kwarta sulod sa 15 ka adlaw.

Giingong maayo lang sa primero kay naka-payout pa sila apan nagkadugay wala na. Giingong nagpahigayon og promo ang maong kompaniya diin kun mohulog sila og kwarta nianang adlawa, modoble ilang gi-invest sulod lang sa pito ka adlaw.

Apan sukad nga nihulog sila og kwarta alang sa maong promo, giingong gipang-blocked sila sa group chat sa mga investors ug wala na nagparamdam si Villazar. Usa sa mga biktima nihulog og dul-an tunga sa milyon ka pesos.

Bisan pa man og adunay gihuptang pangalan ang mga biktima sa suspek, matud ni Abatayo nga ila una kining subayon aron makompirmar kun mao ba gyud kini ang iyang tinuod nga pangalan.

Ang direktor sa Police Regional Office-7 nga si Police Brigadier General Debold Sinas niawhag sa mga nabiktima sa investment scam nga mosumbong sa kapolisan aron masikop ug matagam ang mga mangingilad.

Una na nga gipahinumduman sa Securities and Exchange Commission ang publiko nga dili magpadala sa mga investment company nga dili rehistrado sa ilang ahensya. Niadtong Hunyo gipangsira ang mga gipang-ila nga mga investment company diin usa na ang Kapa-Community Ministry International Inc. ug ang Organico Agribusiness Ventures Corp. (/GMR)(BANATNEWS)