Transaksyon sa drugas gibulabog

CEBU, Philippines — Gibulabog sa usa ka lalaki ang ila unta transaksyon sa ginadiling drugas atol sa kapistahan sa Lungsod sa Cordova niadtong Domingo.

Si Police Major Orlando Carag Jr., hepe sa Talisay City Police Station niingon nga ang pagkapatay sa duha ka durugista ug pagkasikop sa usa nila ka kauban maoy resulta sa pagsumbong sa usa ka Michael ngadto sa awtoridad sa ilang ilegal nga negosyo.

Si Michael niangkon nga mogamit siya og ginadiling drugas samtang siya unta maoy gisugo ni Jorge Malinao aron maoy momaniobra sa pagbaligya og usa ka kilong shabu sa Cordova sa pagtuo nga daghan ang mamalit tungod sa kapistahan.

Apan sa iyang konsensya nga daghan ang mabuang sa matang sa negosyo, nilahos kini sa Cordova Police Station ug gisaysay ang ilang transaksyon ni Malinao.

Dali nga nakig-alayon ang Cordova Police sa Talisay City Police ug gihimo ang operasyon nga niresulta sa pagsinukliay og bala hangtud nga napatay si Malinao ug kauban nga si Dixson Pacaldo ug nasikop si Rolando Dacayana.

Sa gihimong pakisusi, anaa sa listahan sa mga tawo nga nalambigit sa ginadiling drugas si Malinao kinsa lumad nga taga Lanao Del Norte ug nag-abang kini og usa ka subdivision sa Barangay Cansojong, Dakbayan sa Talisay hangtud nga nibalhin kini og puyo sa ilang Dacayana.

Naswertehan ang usa sa mga operatiba tungod kay nagsul-ob kini og vest hinungdan nga wala nakalusot ang bala.

Samtang tunga sa milyon ka pesos ang balor sa ilegal nga drugas ang nasakmit sa buy-bust operation sa Barangay Calamba ug Tisa, Dakbayan sa Sugbo kagahapon sa kaadlawon.

Sa Sitio Mahayahay 2, Calamba, alas 12 sa kaadlawon nadakpan ang duha ka anaa sa watchlist nga sila si Dahlia Baar Ducay, 26, ug Joseph Soriano Hernane, 49, mga residente sa dapit.

Ang tanang nasakmit nga shabu nitimbang og 58 ka gramo nha mobalor og P394,400.

Sa Filter Site, Barangay Tisa nasikop si Francis Feldan Hibaya Pabalate, 36, drayber sa habal-habal ug residente sa Sitio Sidlakan sa maong barangay.

Nasikop sab ang gikatahong kakunsabo niini nga sila si Vincent Khalid Alcordo Yuson, 31, ug si Nestor Casas Aguilar, 43, pulos taga Sitio Mohon 2 sa maong barangay. Ang mga dinakpan nakuhaan og 36 ka gramo nga shabu nga mobalor og P244,800.

Dugang nadakpan sa managlahing buy-bust operation sa Dakbayan sa Sugbo niadtong Domingo ang managsuon nga sila si Rydell Survilla, 22, ug Ryan Survilla, 24, taga Sitio Rotunda, Barangay Banilad, kinsa nasakmitan og 27 ka pakete sa shabu nga balor og P34,204.

Sa Barangay Suba nadakpan sab sila si Leo Dotado, 33, taga Catarman, Cordova, ug Wilmar Sablas alyas Bayogyog, 25, nagpuyo ra sab sa maong lugar kinsa nasakmitan og pito ka pakete sa gituohang shabu nga balor og P17,680.

Sa Barangay Sawang, Calero nadakpan sab si Alma Cabido, 51, kinsa nasakmitan og walo ka pakete sa gituohang shabu balor og P136,000.

Nadakpan sab sa Barangay Inayawan si Romualdo Naag Jr., 27, traysikad driver, kinsa nasakmit og 10 ka pakete sa shabu nga nagkantidad og P2,040. Sa pikas bahin mokabat sa P767,380 nga kantidad sa shabu  ang nasakmit sa Oplan Limpiyo sa kapolisan sa Dakbayan sa Danao nga niresulta sa pagkasikop sa 27 ka tawo.

Si Police Lieutenant Colonel Maribel Getigan, hepe sa Danao City Police Station, niingon nga 10 ang nalambigit sa ilegal nga drugas ug 17 ang nadakpan sa ilegal nga sugal.  - Jenny Luz R. Tejas (BANAT NEWS)